ខេត្តស្វាយរៀង៖ រដ្ឋបាលក្រុងបាវិតអំពាវនាវដល់បងប្អូនប្រជាពលរដ្ឋជាពិសេសកម្មករកម្មការិនីទាំងអស់កុំឲ្យលេងជះ និងគប់ទឹកដាក់គ្នាដែលនឹងអាចបង្កឲ្យមានគ្រោះថ្នាក់ដល់អ្នកដទៃក៏ដូចជាអ្នកធ្វើដំណើរផងដែរ។
យោងតាមមន្ត្រីសាលាក្រុងបាវិតបានឲ្យដឹងថា រដ្ឋបាលក្រុងបាវិតបានចេញសេចក្តីជូនដំណឹងដល់បងប្អូនប្រជាពលរដ្ឋ កម្មករ កម្មការិនីរោងចក្រទាំងអស់កុំឲ្យលេងជះទឹក គប់ទឹកដាក់គ្នា ព្រោះកន្លងមកពិនិត្យឃើញភាពមិនប្រក្រតីនៃការលេងគប់ទឹកដាក់គ្នានៅពេលដែលបងប្អូនកម្មករកម្មការិនីទៅធ្វើការ និងពេលត្រឡប់ទៅផ្ទះវិញ។
ប្រភពបន្តថា កន្លងមកក៏ធ្លាប់មានគ្រោះថ្នាក់កើតឡើងពីការលេងគប់ទឹកដាក់គ្នានេះនាពេលចូលឆ្នាំខ្មែរម្ដងៗ ដោយពិនិត្យឃើញនូវទង្វើដែលនាំឲ្យមានគ្រោះថ្នាក់បែបនេះ ទើបរដ្ឋបាលក្រុងបាវិត ចាត់វិធានការហាមឃាត់ជាដាច់ខាតមិនអនុញ្ញាតឲ្យជនណាម្នាក់លេងគប់ទឹកដាក់គ្នាឡើយ ហើយបើមានជនណានៅតែបន្តលេងជះទឹក គប់ទឹក ហើយបណ្តាលឲ្យមានគ្រោះថ្នាក់ដល់អ្នកដ៏ទៃ ជននោះនិងទទួលទោសតាមផ្លូវច្បាប់ជាធរមាន។
ប្រភពបន្តថា បងប្អូនប្រជាពលរដ្ឋទាំងអស់សូមចូលរួមជួយថែរក្សាអនាម័យកុំចោលសំរាមតាមដងផ្លូវពាសវាលពាសកាលដែលធ្វើឲ្យបាត់បង់សោភ័ណ្ឌភាពទីក្រុងផងដែរ៕
ដោយ៖ យឹម សុថាន
