ភ្នំពេញ៖ បុរសម្នាក់ជិះម៉ូតូទៅយកកូននៅកន្លែងធ្វេីការស្រាប់តែមានរថយន្តមិនចាំម៉ាកបេីកមកកៀរបណ្តាលឱ្យជ្រុលចង្កូតទៅបុកកន្ទុយរថយន្តចតចោលលេីចិញ្ចេីមផ្លូវបណ្តាលឱ្យបោកក្បាលរងរបួសធ្ងន់ហេីយបានស្លាប់ពេលបញ្ជូនទៅដល់មន្ទីរពេទ្យ។
ហេតុការណ៍នេះបានកេីតឡេីងកាលពីវេលាម៉ោង៩និង៤០នាទីយប់ ថ្ងៃទី១១ ខែវិច្ឆិកា ឆ្នាំ២០២១ នៅចំណុចខាងត្បូងច្រកចូលវត្តពោធិ៍វ័ន តាមបណ្តោយមហាវិថីឈ្នះ=ឈ្នះ ក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះឈ្មោះផន ឌឹម ភេទប្រុសអាយុ៥៣ឆ្នាំ ស្នាក់នៅភូមិត្រពាំងអញ្ចាញ សង្កាត់ត្រពាំងក្រសាំង ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនពេលកេីតហេតុគេបានឃេីញរថយន្តកុងតឺន័រមួយគ្រឿងបានមកឈប់នៅចំណុចកេីតហេតុ រួចដោះកន្ទុយសណ្តោងទុកចោលនៅចិញ្ចេីមផ្លូវក្នុងទិសដៅពីជេីងទៅត្បូងហេីយបេីកក្បាលរថយន្តទៅបាត់ទៅ ។ លុះមកដល់វេលាកេីតហេតុស្រាប់តែមានបុរសម្នាក់ជិះម៉ូតូម៉ាកBeat ពណ៌ខៀវលាយស ពាក់ស្លាកលេខភ្នំពេញ1GX-4013 ធ្វេីដំណេីរតាមបណ្តោយមហាវិថីឈ្នះ=ឈ្នះក្នុងទិសដៅពីជេីងទៅត្បូងទាំងមេឃកំពុងធ្លាក់ភ្លៀង ខណៈមកដល់ចំណុចកេីតហេតុស្រាប់តែមានរថយន្តមិនចាំម៉ាកមួយគ្រឿងបេីកបរមកពីក្រោយហេីយបានកៀរម៉ូតូជនរងគ្រោះបណ្តាលឱ្យម៉ូតូរេចង្កូតទៅបុកកន្ទុយរថយន្តដែលគេចតចោលពេញទំហឹងធ្វើឱ្យអ្នកបើកម៉ូតូរងរបួសធ្ងន់ធ្ងរ។
ប្រភពដដែលបានបន្តថា ភ្លាមៗនោះជនរងគ្រោះក៏ត្រូវរថយន្តសង្គ្រោះដឹកយកទៅសង្គ្រោះនៅមន្ទីរពេទ្យ តែជាអកុសលជនរងគ្រោះបានស្លាប់ពេលបញ្ជូនទៅដល់មន្ទីរពេទ្យ។
ក្រោយកេីតហេតុសមត្ថកិច្ចបានចុះទៅដល់ ហើយបានប្រគល់សពទៅឱ្យក្រុមគ្រួសារយកទៅធ្វេីបុណ្យតាមប្រពៃណី។ ចំណែកម៉ូតូនិងកន្ទុយរថយន្តត្រូវបានសមត្ថកិច្ចធ្វេីការវាស់វែងយកទៅរក្សាទុករង់ចាំស្វែងរកម្ចាស់រថយន្តចូលខ្លួនមកដោះស្រាយតាមច្បាប់៕
ដោយ៖សុខាសែនជ័យ
