ភ្នំពេញ : ចៅក្រមសាលាដំបូងរាជធានី ភ្នំពេញបានសម្រេចឃុំខ្លួនបុរស ជនជាតិ ចិនបីនាក់ពាក់ព័ន្ធការបង្ខាំងជនជាតិថ ចំនួន ៩៩នាក់ ដើម្បីជម្រិតទារប្រាក់» នៅព្រឹកថ្ងៃទី២៣ ខែវិច្ឆិកា នេះ។ ការបង្ខាំងឃុំជម្រិតទារប្រាក់ បន្ទាប់ពីចាញ់បោកមេខ្យល់មកធ្វើការឱ្យ ក្រុមហ៊ុនលក់ ផលិតផល តាមអនឡាញ មួយ ស្ថិតក្នុងសង្កាត់ភ្នំពេញ ខណ្ឌសែនសុខ រាជធានីភ្នំពេញ។
គួររំលឹកថា លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ នៅរសៀលថ្ងៃទី ២១ ខែវិច្ឆិកា បានបញ្ជាក់ថា ជនជាតិចិនចំនួន ៣នាក់ នឹងត្រូវសមត្ថកិច្ចកសាងសំណុំរឿង បញ្ជូនទៅសាលាដំបូងរាជធានីភ្នំពេញ បន្ទាប់ពី ពួកគេត្រូវបានសមត្ថកិច្ចរកឃើញពាក់ព័ន្ធនឹងការប្រព្រឹត្តបទល្មើសក្នុងចំណោមជនជាតិចិនចំនួន ៧៧ នាក់។
លោកឧត្តមសេនីយ៍ឯក ឆាយ គឹមខឿន បញ្ជាក់ទៀតថា កាលពីថ្ងៃទី ១៨ វិច្ឆិកា ឆ្នាំ ២០២១ សមត្ថកិច្ចជំនាញក្រសួងមហាផ្ទៃបានធ្វើប្រតិបត្តិការបង្ក្រាបក្រុមជនជាតិចិនមួយក្រុម នៅក្នុងផ្ទះ១ ក្នុងខណ្ឌសែនសុខ រាជធានីភ្នំពេញ ហើយក្នុងប្រតិបត្តិការនោះ សមត្ថកិច្ចបានរំដោះជនជាតិថៃបានសរុប ៩៩ នាក់ ក៏ប៉ុន្តែជនជាតិថៃទាំងនោះសុទ្ធតែចូលមកប្រទេសកម្ពុជា ដើម្បីបំពេញការងារដោយខុសច្បាប់។ ហេតុដូច្នេះសមត្ថកិច្ចជំនាញបានចាប់ខ្លួនពួកគេប្រគល់ឲ្យផ្នែកអន្តោប្រវេសន៍កម្ពុជា។
សូមបញ្ជាក់ថា, អ្នកនៅស្រុកខ្មែរមានមេខ្យល់បបួលទៅធ្វើការនៅថៃ ឯនៅថៃមានមេខ្យល់បបួលមកធ្វើការនៅខ្មែរ ! ក្នុងរូបគឺកងនគរបាលខ្មែរចូលរំដោះជនជាតិថៃចំនួន ៩៩ នាក់ដែលគេយកមកធ្វើការនៅស្រុកខ្មែរដោយខុសច្បាប់ហើយឃុំឃាំងពួកគេនៅក្នុងអគារមួយកន្លែងក្នុងក្រុងភ្នំពេញ កាលពីថ្ងៃទី ១៨ វិច្ឆិកា ២០២១ – រូបថតកាសែតបាងកកប៉ុស្តិ ចេញផ្សាយថ្ងៃសុក្រ ទី ១៩ វិច្ឆិកា ២០២១។ នេះជាការបង្ហោះលើផេកផ្លូវការ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ប្រមាណ៤ថ្ងៃមុននេះ។
បច្ចុប្បន្ន ជនត្រូវចោទទាំង៣នាក់ត្រូវបានសមត្ថកិច្ចនាំទៅឃុំខ្លួន ម.១ ជាបណ្តោះអាសន្ន៕
ដោយ រ៉ារ៉ា
