ខេត្តស្វាយរៀង៖ គ្រូពេទ្យអត់សញ្ញាប័ត្រម្នាក់ត្រូវបានសមត្ថកិច្ចនគរបាលស្រុករមាសហែកធ្វើការឃាត់ខ្លួន កាលពីព្រឹកថ្ងៃទី៩ ខែមេសា ឆ្នាំ២០១៦ ស្ថិតក្នុងភូមិឈើភ្លើងនៅឃុំកំពង់ត្រាច ស្រុករមាសហែក ខេត្តស្វាយរៀង បន្ទាប់ពីចាក់ថ្នាំដល់អ្នកជម្ងឹស្លាប់។
សមត្ថកិច្ចនគរបាលស្រុករមាសហែកបានអោយដឹងថាជនសង្ស័យដែលជាពេទ្យឯកជនគ្មានសញ្ញាប័ត្រមានឈ្មោះព្រំសុខា ភេទប្រុស អាយុ៤១ឆ្នាំ មុខរបរដើរចាក់ថ្នាំតាមភូមិ មានទីលំនៅក្នុងភូមិឈើភ្លើងនៅ ឃុំកំពង់ត្រាច ស្រុករមាសហែក។ រីឯជនរងគ្រោះមានឈ្មោះ ព្រាបឆាន អាយុ៣៧ឆ្នាំ មុខរបរកសិករ មានទីលំនៅក្នុងភូមិឃុំជាមួយជនសង្ស័យ។
ប្រភពពីសមត្ថកិច្ចនគរបាលបន្តថា មុនពេលកើតហេតុនៅវេលាម៉ោង១០យប់ជនរងគ្រោះមានអាការះចុកពោះទល់លាមកហើយក៏បានហៅជនសង្ស័យជាគ្រូពេទ្យអត់ច្បាប់មកពិនិត្យរួចជនសង្ស័យក៏បានចាក់ថ្នាំចំនួន៣ម្ជុលរហូតមកដល់វេលាម៉ោង៣ទាបភ្លឺឈានចូលថ្ងៃទី៩ខែមេសាឆ្នាំ២០១៦ ជនរងគ្រោះក៏បានបាត់បង់ជីវិតបាត់ទៅ។
ក្រោយពេលកើតហេតុក្រុមគ្រួសារជនរងគ្រោះក៏បានដាក់ពាក្យបណ្ដឹងមកសមត្ថកិច្ចមូលដ្ឋាននិងមន្ទីរសុខាភិបាលខេត្តក៏បានធ្វើការឃាត់ខ្លួនជនសង្ស័យមកសាកសួរនៅអធិការដ្ឋាននគរបាលស្រុករមាសហែកដើម្បីចាត់ការបន្តតាមច្បាប់៕
ដោយ៖ យឹម សុថាន
