ខេត្តពោធិ៍សាត់៖ កុមារាអាយុ៥ឆ្នាំម្នាក់បានដើរជិតម៉ាស៊ីនកិនស្រូវ ទាក់ដៃអាវឆ្មូលចូលកង់យោងម៉ាស៊ីនកិនស្រូវបោកបែកក្បាលនិងបាក់ដៃរស្លាប់ នៅពេលបញ្ជូនទៅមន្ទីរពេទ្យបង្អែកខេត្ត។
ហេតុការណ៍នេះបានកើតឡើងកាលពីវេលាម៉ោង៩ និង៣០នាទីព្រឹកថ្ងៃទី៩ ខែមេសា ឆ្នាំ២០១៦ ត្រង់ចំរោងម៉ាស៊ីនកិនស្រូវក្បែរផ្ទះ ស្ថិតក្នុងភូមិប្រឡាយធំ ឃុំវាល ស្រុកកណ្ដៀង ខេត្តពោធិ៍សាត់។
ប្រភពព័ត៌មានពីសមត្ថកិច្ចប្រាប់ថា កុមារារងគ្រោះឈ្មោះ សុង ហួត អាយុ៥ឆ្នាំ ឪពុកឈ្មោះ អ៊ឹង វុទ្ធី អាយុ៣៦ឆ្នាំ និងម្ដាយឈ្មោះ តាំង ដាវី អាយុ៣៤ឆ្នាំ រស់នៅភូមិឃុំកើតហេតុ។
ប្រភពបន្តថា តាមការរៀបរាប់ពីឪពុកម្ដាយប្រាប់ថា កូនគាត់បានដើរចូលមកក្បែរកង់យោងម៉ាស៊ីនកិនស្រូវ នៅគ្រាដែលពួកគាត់ជាប់រវល់ហើយភ្លេចភ្នែកមួយភ្លែត ស្រាប់តែកង់យោងទាក់ដៃរអាវឆ្មូលបោកផ្ទប់បណ្ដាលឲ្យបែកក្បាលនិងបាក់ដៃឆ្វេង បណ្ដាលឲ្យរងរបួសធ្ងន់បញ្ជូនទៅមន្ទីរពេទ្យបង្អែកខេត្តភ្លាមៗ ប៉ុន្ដែជាអកុសលដោយ់របួសធ្ងន់ធ្ងរពេកក៏ដាច់ខ្យល់ស្លាប់យ៉ាងអាណោចអាធ័ម។
ប្រភពបន្តទៀងថា ក្រោយសមត្ថកិច្ចទទួលបានព័ត៌មាននេះបានចុះទៅកន្លែងកើតហេតុ ហើយស្រាវជ្រាវប្រភពនានាជុំវិញកន្លែងកើតហេតុ ឃើញថាកុមារារងគ្រោះពិតជាស្លាប់ដោយសារដៃអាវទាក់ចូលកង់យោងម៉ាស៊ីនកិនស្រូវពិតប្រាកដមែន ក៏បានប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ ប៉ឹម ពិន
