ខេត្តស្វាយរៀង៖ សមត្ថកិច្ចនគរបាលស្រុកសហការជាមួយនគរបាលប៉ុស្តិ៍រដ្ឋបាលចន្ទ្រា ឃាត់ខ្លួនជនសង្ស័យជាប្ដីបានស្រវឹងស្រា វាយប្រពន្ធនិងរឹតកបណ្ដាលអោយស្លាប់គួរអោយសង្វេគ។
ហេតុការណ៍នេះបានកើតឡើងកាលពីវេលាម៉ោង៨និង១៥នាទីយប់
ថ្ងៃទី០៤ ខែធ្នូ ឆ្នាំ២០២១ ស្ថិតនៅត្រង់ចំណុចភូមិសែនត ឃុំចន្ទ្រា ស្រុកចន្ទ្រា។
សមត្ថកិច្ចនគរបាលស្រុកបានអោយដឹងថាជនសង្ស័យជាប្ដីមានឈ្មោះនេត រ៉ា អាយុ៤៤ ឆ្នាំ មុខរបរកសិករមានទីលំនៅភូមិសែនត ឃុំចន្រ្ទា ស្រុកចន្ទ្រា ខេត្តស្វាយរៀង ចំណែកជនរងគ្រោះមានឈ្មោះសោ សុខី អាយុ ៤៤ឆ្នាំមុខរបរកសិករ រស់ក្នុងភូមិឃុំជាមួយគ្នា។
ប្រភពបន្តថាបន្ទាប់ពីទទួលបានព័ត៌មាន ពីប៉ុស្តិ៍នគរបាលរដ្ឋបាលចន្ទ្រាភ្លាម លោក ជិន សុភឿន អធិការនគរបាលស្រុក បានចាត់កម្លាំងជំនាញ សហការជាមួយ កម្លាំងប៉ុស្តិ៍នគរបាលរដ្ឋបាលចន្ទ្រា ចុះដល់កន្លែងកើតហេតុ បានឃាត់ខ្លួនជនសង្ស័យមកសាកសួរតែម្ដង។
ដោយមុនកើតហេតុជនសង្ស័យជាប្ដីបានផឹកស្រាស្រវឹងរហូតមានទំនាស់ពាក្យសំដីឈានដល់ប្រើហិង្សា
ដោយបានវាយប្រពន្ធ មួយដៃហើយ ទាញអាវទៅរឹតកពីក្រោយ បណ្តាលឲ្យប្រពន្ធប្រកាច់ស្លាប់ភ្លាម មុនពេលបញ្ជូនទៅដល់មន្ទីរពេទ្យ ។
សមត្ថកិច្ចបានបញ្ជាក់ថាមូលហេតុដោយសារតែ ប្តីស្រវឹងស្រាវាយប្រពន្ធ ហេីយប្រពន្ធមានជំងឺបេះដូងប្រចាំកាយ ។
សមត្ថកិច្ចបន្តថា សូមបងប្អូន កុំប្រើប្រាស់អំពើហិង្សាគ្រប់រូបភាព ទោះបីក្នុងកាលៈទេសៈ ឬ ស្ថានភាពណាក៏ដោយ កំហឹងមួយពេល កំហុសមួយជីវិតខឹងខុស ខឹងខាត។
បច្ចុប្បន្នសាកសពស្ត្រីជាប្រពន្ធត្រូវបានសាច់ញាតិយកទៅធ្វេីបុណ្យតាមប្រពៃណី រីឯជនសង្ស័យ សមត្ថកិច្ចនគរបាលស្រុកចន្ទ្រា បានធ្វើការឃាត់ខ្លួននិងកសាងសំណុំរឿងបញ្ជូនទៅសាលាដំបូងខេត្ត ចាត់ការតាមច្បាប់៕
ដោយ៖ យឹម សុថាន
