ខេត្តមណ្ឌលគិរី៖ បើយោងតាមអង្គភាព មន្ទីរព័ត៌មានខេត្តមណ្ឌលគិរី បានបញ្ជាក់អោយដឹងថា, នាព្រឹកថ្ងៃទី០៧ ខែធ្នូ ឆ្នាំ២០២១ លោក ថង សាវុន អភិបាលខេត្តមណ្ឌលគិរី និង ម៉ែន ង៉ុយ ប្រធានក្រុមប្រឹក្សាខេត្ត រួមទាំងមន្ទីរអង្គភាពពាក់ព័ន្ធ និងអាជ្ញាធរស្រុក បានអញ្ជើញជួបសំណេះសំណាលសួរសុខទុក្ខ និងនាំយកអំណោយរបស់រាជរដ្ឋាភិបាល ផ្តល់ជូនពលរដ្ឋក្រីក្រ ជនចាស់ជរា ជនពិការ កុមារកំព្រា ចំនួន ១១០គ្រួសារ ដែលប្រព្រឹត្តទៅនៅសាលាស្រុកពេជ្រាដា។
អង្គភាព មន្ទីរព័ត៌មានខេត្តមណ្ឌលគិរី បានបន្តថា លោក ថង សាវុន អភិបាលខេត្ត បានពាំនាំនូវការផ្ដាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលសម្តេចទាំងទ្វេរ តែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ លោក បញ្ជាក់ថា អំណោយទាំងនេះ គឺជាអំណោយរបស់រាជរដ្ឋាភិបាលកម្ពុជា ផ្តល់ជូនតាមរយៈមន្ទីរសង្គមកិច្ច អតីយុទ្ធជន និងយុវនីតិសម្បទាខេត្ត ផ្តល់ជូនដល់ពលរដ្ឋខ្វះខាត ក្នុងបរិបទនៃជំងឺកូវីដ-១៩ ដើម្បីជួយសម្រាលទុក្ខលំបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំផងដែរ។ លោក បានណែនាំដល់បងប្អូនប្រជាពលរដ្ឋទាំងអស់ សូមកាត់បន្ថយការអាស្រ័យផលលើធនធានធម្មជាតិ ហើយងាកមកធ្វើការដាំដុះ និងប្រកបរបរផ្សេងៗ ដើម្បីបង្កើនកំរិតជីវភាពគ្រួសារ ឲ្យមានលក្ខណៈសមរម្យ និងត្រូវជំរុញដល់កូនចៅឲ្យខិតខំសិក្សារៀនសូត្រឲ្យបានជ្រៅជ្រះ ដើម្បីយកចំណេះដឹង មកអភិវឌ្ឍនៅក្នុងមូលដ្ឋានរបស់ខ្លួន ឲ្យមានការរីកចម្រើន។ លោក ថង សាវុន អភិបាលខេត្ត បានណែនាំដល់ប្រជាពលរដ្ឋ ដែលមិនទានចាក់វ៉ាក់សាំង សូមទៅចាក់នៅតាមមន្ទីរពេទ្យបង្អែក ឬមណ្ឌលសុខភាព ឫទីតាំងណាមួយ ដែលរដ្ឋបាលក្រុង/ស្រុក បានកំណត់ជូនប្រជាពលរដ្ឋ។ លោក បន្ថែមថា ទោះបីជាយើងបានចាក់វ៉ាក់សាំងរួចហើយក៏ដោយ ក៏យើងត្រូវបន្តចូលរួមអនុវត្តវិធានការ ៣ការពារ ៣កុំ ដើម្បីកាត់បន្ថយការឆ្លងជំងឺកូវីដ-១៩ ។
តាមរបាយការណ៍របស់លោក ខឹម សុផុន ប្រធានមន្ទីរសង្គមកិច្ច អតីយុទ្ធជន និងយុវនីតិសម្បទាខេត្ត បានឲ្យដឹងថា ប្រជាពលរដ្ឋក្រីក្រចំនួន ១១០គ្រួសារ នៅស្រុកពេជ្រាដា ទទួលអំណោយសង្គ្រោះបន្ទាន់ ដោយក្នុង១គ្រួសារ ទទួលបាន អង្ករ ២០គីឡូក្រាម ត្រីខ ១យួរ ទឹកត្រី ១យួរ ភួយចំនួន ១ កន្ទេល ១ និងអាវរងា ១ផងដែរ៕

ដោយ : សិលា