ខេត្តស្វាយរៀង៖ បុរសចំណាស់ម្នាក់រៀនបើករថយន្តចៃដន្យអាក្រក់ជាន់ហ្វ្រាំងមិនស៊ី ធ្លាក់ទឹកត្រពាំងសំណាងមិនគ្រោះថ្នាក់ដល់ជីវិតបង្កការភ្ញាក់ផ្អើលដល់ពលរដ្ឋនិងអ្នកធ្វើដំណើរ។

ហេតុការណ៍នេះ បានកើតឡើងកាលពីវេលាល្ងាចម៉ោង៤ល្ងាច ថ្ងៃទី៩ ខែឆ្នូ ឆ្នាំ២០២១ ស្ថិតក្នុងភូមិត្រពាំងស្លា ឃុំដូង ស្រុករមាសហែក ខេត្តស្វាយរៀង។
យោងតាមសមត្ថកិច្ចនគរបាលបានអោយដឹងថាបុរសខាងលើឈ្មោះ សូ ស៊ុត ៥៣ឆ្នាំ រស់នៅក្នុងភូមិត្រពាំងស្លា ឃុំដូង ស្រុករមាសហែក ខេត្តស្វាយរៀង។

ប្រភពពីអ្នកភូមិបានអោយដឹងថាមុនកើតហេតុគេឃើញបុរសចំណាស់ខាងលើបានបើករថយន្តដឹកដីប្រភេទ ១តោនកន្លះ ធ្វើដំណើរពីកើតមកលិច
លុះមកដល់ចំណុចដីភូមិរបស់គាត់ ដែលមានទឹកត្រពាំង ហើយខណ:នោះគាត់ក៏ជាន់ហ្វ្រាំងមិនសុី រថយន្តនៅតែទៅមុខរហូត ធ្លាក់ចូលក្នុងត្រពាំងទើបបង្កការភ្ញាក់ផ្អើលតែម្តង។

ប្រភពបន្តថា រថយន្តនេះជារបស់កូនទេប៉ុន្តែដោយកូនប្រុសជាប់រវល់ទៅរៀនជួសជុលរថយន្តនៅភ្នំពេញ ហើយក៏បានទុករថយន្តនៅផ្ទះឪពុករបស់ខ្លួនហេតុដូចនេះដោយសារតែចង់ចេះបើករថយន្តឆាប់ៗទើបឪពុកទាញយកមករៀន បើកក៏ជ្រុលចង្កូតជាន់ហ្វ្រាំងធ្លាក់ត្រពាំងតែម្តងទៅ ប៉ុន្តែសំណាងល្អចេះស្ទុះលោតចេញពីរថយន្តទាន់កុំអីមិនដឹងថាទៅជាយ៉ាងណានោះទេ។
ក្រោយកើតហេតុ បុរសខាងលើក៏បានហៅ អេស្កាវ៉ាទ័រ មកទាញស្ទូចយកចេញពីក្នុងត្រពាំង ដើម្បីយកទៅជួសជុលដោយខ្លួនឯងព្រោះមិនមានរងគ្រោះថ្នាក់ដល់អ្នកភូមិអ្វីនោះទេ៕

ដោយ៖ យឹម  សុថាន