ខេត្តកែប : យោងតាមប្រភពពីរដ្ឋបាលខេត្តកែប បានបញ្ជាក់អោយដឹងថា, នាព្រឹកថ្ងៃសៅរ៍​ ទី១១ ខែធ្នូ ឆ្នាំ២០២១ នេះ​ ក្រុមគ្រូពេទ្យស្មគ្រចិត្ត លោកបណ្ឌិត ហ៊ុន ម៉ាណែត បាននាំយក សម្ភារៈសុខាភិបាល ដែលរួមមាន​ សម្ភារៈជំនួយការពិនិត្យជំងឺទូទៅ និងរោគស្រ្តី , សម្ភារៈជំនួយការងារមន្ទីរពិសោធន៍, សម្ភារៈជំនួយការវះកាត់ និងបរិក្ខាផ្សេងៗចំនួន ១៥០កេះ , ម៉ាស៊ីន X-Ray (Dentist) ០១គ្រឿង, ព្រមទាំងជែលលាងសម្អាតដៃចំណុះ ៥០០ml ចំនួន ៣០,០០០ដប ដែលជាអំណោយដ៏ថ្លៃថ្លា របស់លោកបណ្ឌិត ហ៊ុន ម៉ាណែត និងលោកស្រី ពេជ ចន្ទមុន្នី ជូនដល់ រដ្ឋបាលខេត្តកែប ដើម្បីបំរើឱ្យវិស័យសុខាភិបាល និងចូលរួមក្នុងយុទ្ធនាការប្រយុទ្ធប្រឆាំង និងជំងឺកូវីដ-១៩ ក៏ដូចជាបំរើអោយការងារមនុស្សធម៏។
អញ្ជើញទទួលអំណោយដ៏ថ្លៃថ្លានេះ លោក សោម ពិសិដ្ឋ អភិបាល​ នៃគណៈអភិបាលខេត្តកែប បានសំដែងនូវទឹកចិត្ត សប្បាយរីករាយ និងថ្លែងអំណរគុណ ដល់លោកបណ្ឌិត ហ៊ុន ម៉ាណែត និងលោកស្រី ដែលតែងផ្តល់នូវការឧបត្ថម្ភ​ ទាំងស្មារតី សម្ភារៈ និងឱវាទល្អៗសម្រាប់រដ្ឋបាលខេត្តកែប ទាំងការងារដឹកនាំ និងបំរើសេវាជូនប្រជាពលរដ្ឋ។ លោក បញ្ជាក់ថា បើទោះជាស្ថានភាពជំងឺកូវីដ-១៩​ នៅខេត្តកែប មានការធូរស្រាលក៏ពិតមែន តែប្រជាពលរដ្ឋមួយចំនួន ដែលរងវិបត្តិដោយសារជំងឺនេះ នៅពុំទាន់ មានជីវភាពប្រក្រតីវិញនៅឡើង ដែលទាមទារអោយមានការជួយជ្រុំជ្រែង ពីអាជ្ញាធរ ដើម្បីសម្រួលដល់ជីវភាពប្រចាំថ្ងៃ។ លោក អភិបាលខេត្ត ក៏បានអំពាវនាវ ដល់សប្បុរសជននានា បន្តជួយឧបត្ថម្ភដល់ រដ្ឋបាលខេត្ត លើកការងារប្រយុទ្ធប្រឆាំងនឹងជំងឺកូវីដ-១៩ និងការងារមនុស្សធម៌ នៅតាមសហគមន៍ មូលដ្ឋាន ដែលបង្ហាញ ឱ្យឃើញនូវសិល្បៈចែករំលែក និងស្មារតីចេះជួយគ្នាទៅវិញទៅមក របស់សប្បុរសជននៅគ្រប់ទិសទី។ ក្នុងនោះលោក អភិបាលខេត្ត ក៏បានគោរពជូនពរជ័យ ដល់លោកបណ្ឌិត ហ៊ុន ម៉ាណែត និង លោកស្រី រួមទាំងបុត្រាបុត្រី ប្រកបដោយពុទ្ធពរបួនប្រការ អាយុ វណ្ណៈ សុខៈ ពលៈ ព្រមទាំងជៀសផុតពីជំងឺកូវីដ-១៩ ជានិច្ច និងនិរន្តតទៅ ។
បន្ទាប់មកលោក អភិបាលខេត្ត ក៏បានបន្តប្រគល់សម្ភារៈទាំងអស់ ដល់មន្ទីរពេទ្យបង្អែកខេត្តកែប ដើម្បីយកទៅទុកដាក់ ប្រើប្រាស់អោយចំគោលដៅ ៕

ដោយ : សហការី