ភ្នំពេញ ៖ បុរសម្នាក់បើករថយន្តបែនដឹកដីធុនធំក្នុងល្បឿនលឿនខ្វះការប្រុងប្រយ័ត្នជ្រុលទៅបុកម៉ូតូពីក្រោយបណ្ដាលឲ្យក្មេងស្រីអាយុ២ខួបម្នាក់ស្លាប់នៅកន្លែងកើតហេតុ និងស្ត្រីម្នាក់ទៀតរងរបួសធ្ងន់ត្រូវបានបញ្ជូនទៅមន្ទីរពេទ្យ។

ហេតុការណ៍នេះបានបង្កការភ្ញាក់ផ្អើលកាលពីវេលាម៉ោង៩ និង៣០នាទីព្រឹកថ្ងៃទី ២២ ខែធ្នូ ឆ្នាំ២០២១ ដែលស្ថិតនៅតាមបណ្តោយផ្លូវបេតុង ក្នុងសង្កាត់គោកឃ្លាងខណ្ឌសែនសុខ រាជធានីភ្នំពេញ។

ជនរងគ្រោះមានឈ្មោះ ម៉េង ហ៊ង អាយុ២ខួប មានស្រុកកំណើតនៅក្នុងភូមិបាយ៉ាប សង្កាត់ភ្នំពេញថ្នី ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេបានឃើញម៉ូតូមួយគ្រឿងម៉ាក zoomer x ពណ៌ទឹកប្រាក់លាយខ្មៅពាក់ស្លាកលេខភ្នំពេញ 1GG 2475បើកបរដោយស្ត្រីម្នាក់និងរួមដំណើរដោយក្មេងស្រីអាយុពីរខួបម្នាក់ទៀត ធ្វើដំណើរតាមបណ្ដោយផ្លូវបេតុងក្នុងទិសដៅពីលិចទៅកើត លុះមកដល់ត្រង់ចំណុចកើតហេតុស្រាប់តែមានរថយន្តបែនដឹកដីធុនធំមួយគ្រឿងម៉ាកហ៊ីយ៉ាន់ដាយពណ៍លឿងពាក់ស្លាកលេខភ្នំពេញ 3B 9746បើកបរដោយបុរសម្នាក់ក្នុងល្បឿនលឿនខ្វះការប្រុងប្រយ័ត្នជ្រុលទៅបុកពីក្រោយម៉ូតូពេញទំហឹងដួលបោកទៅនឹងថ្នល់បណ្ដាលអោយក្មេងស្រីអាយុពីរ ខួបម្នាក់ស្លាប់នៅនឹងកន្លែងកើតហេតុ និងស្ត្រីដែលជាអ្នកឌុបរងរបួសធ្ងន់ត្រូវបានបញ្ជូនទៅមន្ទីរពេទ្យភ្លាមៗ ចំណែកតៃកុងរថយន្តបង្ករត្រូវបានសមត្ថកិច្ចឃាត់ខ្លួនយកទៅទុកនៅអធិការដ្ឋាននគរបាលខ័ណ្ឌសែនសុខរង់ចាំប្រគល់ឲ្យជំនាញចាត់ការបន្តតាមនីតិវិធី។

ក្រោយកើតហេតុសមត្ថកិច្ចមូលដ្ឋានបានមកដល់រួចបានទំនាក់ទំនងទៅសមត្ថកិច្ចជំនាញចរាចរណ៍នៃស្នងការដ្ឋាននគរបាលរាជធានីភ្នំពេញចុះធ្វើការវាស់វែងយករថយន្តបង្កនិងម៉ូតូជនរងគ្រោះរួមទាំងតែកុងរថយន្តទៅស្នងការនគរបាលរាជធានីភ្នំពេញរង់ចាំចាត់ការបន្តតាមនីតិវិធីច្បាប់ ចំណែកសពជនរងគ្រោះក្រោយសម្ថកិច្ចធ្វើកំណត់ហេតុរួចបានប្រគលឲ្យទៅសាច់ញាតិយកទៅធ្វើបុណ្យតាមប្រពៃណី៕

ដោយ៖ និន សុភ័ស្ត