ខេត្ត​កោះកុង៖ បើ​យោង​តាមសេចក្ដីរាយការណ៍ពី​ប្រជាពលរដ្ឋរស់នៅឃុំព្រែកខ្សាច់ ស្រុកគិរីសាគរ ខេត្តកោះកុង​ បានឱ្យដឹងថា​ បច្ចុប្បន្ន​នេះ​ពួកគាត់​ បាននាំគ្នាផ្ដិតមេដៃជូនសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ គោរពស្នើសុំផ្លាស់ប្ដូរលោក

ហឿង ប៊ុនហេង ចេញពីស្មៀនឃុំព្រែកខ្សាច់ នៃស្រុកគិរីសាគរ ខេត្តកោះកុង។​ បន្ទាប់ពីប៉ុន្មានឆ្នាំចុងក្រោយនេះ ស្មៀនឃុំព្រែកខ្សាច់ លោក ហឿន ប៊ុនហេង ដែលបានបំពេញការងារប្រាស់ចាកពីភាពជាមន្ត្រី ធ្វើការងារមិនបម្រើផលប្រយោជន៍ជូនប្រជាពលរដ្ឋ មិនយកច្បាប់ជាធំ និងបានប្រព្រឹត្តិអំពើពុករលួយ ធ្វើឱ្យពួកគាត់បាត់ទំនុកចិត្តតែម្តង។ 

ជាក់ស្ដែង​យោង​តាមលិខិតស្នើសុំផ្លាស់ប្តូរស្មៀនឃុំព្រែកខ្សាច់​ខាងលេីនេះ ប្រជាពលរដ្ឋបានរាយការណ៍ជូនសម្ដេចក្រឡាហោម​ថា៖ ចាប់តាំងពីប្រទេសជាតិមានសុខសន្តិភាពមក ពួកខ្លួនបានទទួលផលប្រយោជន៍ពីការអភិវឌ្ឍជាតិជាបន្តបន្ទាប់ បានរស់នៅប្រកបដោយសេចក្ដីសុខ សុវត្ថិភាពល្អ រីករាយ ហើយតែងតែគាំទ្រជានិច្ចចំពោះការដឹកនាំរបស់រាជរដ្ឋាភិបាល។​ ជាមួយគ្នានេះ​ ប្រជាពលរដ្ឋបានគោរពថ្លែងអរគុណសម្ដេចតេជោ ហ៊ុន សែន នាយករដ្ឋមន្ត្រី និងសម្ដេចក្រឡាហោម ស ខេង ដែលបានធ្វើឱ្យមានការបោះឆ្នោតឃុំសង្កាត់ ដើម្បីឱ្យពួកគាត់មានសិទ្ធិបោះឆ្នោតជ្រើសរើសតំណាង គឺក្រុមប្រឹក្សាឃុំព្រែកខ្សាច់នេះ។

ប្រជាពលរដ្ឋ​ បានរៀបរាប់​យ៉ាងដូច្នេះ​ថា៖ លោក ហឿង ប៊ុនហេង ជាមន្ត្រីស្មៀន មិនយកចិត្តទុកដាក់ចំពោះសុខទុក្ខប្រជាជន ហើយនៅពេលពលរដ្ឋស្នើលិខិតបញ្ជាក់ទទួលស្គាល់ដីធ្លី លោកមេឃុំចុះហត្ថលេខាហើយ ប៉ុន្តែលោក ហឿង ប៊ុនហេង បែរជាមិនប្រថាប់ត្រាដោយឆ្លើយថាជាន់ដីមេ ឬថាដីទាំងនេះមានម្ចាស់ ខណៈពលរដ្ឋកាន់កាប់ជាក់ស្ដែង។​ មិនតែប៉ុណ្ណោះ​ លោក ហឿង ប៊ុនហេង បានប្រើប្រាស់សិទ្ធិអំណាចរបស់ខ្លួនធ្វើការលក់ប្រេងខុសច្បាប់ ហើយក្នុងពេលមូលដ្ឋាននៃភូមិយាយសែន ឃុំព្រែកខ្សាច់ មានការអភិវឌ្ឍហេដ្ឋារចនាសម្ព័ន្ធ រីកចម្រើនស្ទើរគ្រប់វិស័យនឹងកំពុងទាក់ទាញភ្ញៀវទេសចរជាតិ និងអន្តរជាតិមកលេងកម្សាន្ត តែលោកបែរជាបានប្រព្រឹត្តអំពើខុសច្បាប់ជុំវិញការចាក់ដីលុបព្រែក ដែលជាតំបន់សំបូរទៅដោយជីវៈចម្រុះ។

ប៉ុន្តែ​អ្វីដែលពួកគាត់ហួសចិត្តនោះ គឺលោក​ ហឿង ប៊ុនហេង​ មិនបានស្ដាប់ការណែនាំរបស់សម្ដេចតេជោនាយករដ្ឋមន្រ្តីកម្ពុជា​ ចំពោះការផ្តល់សេវាសាធារណៈនោះទេ។ ខណៈ​ដែល​ប្រជាពលរដ្ឋស្នើធ្វើសំបុត្រកំណើតកូន ឬលិខិតបញ្ជាក់អាពាហ៍ពិពាហ៍ និងឯកសារផ្សេងៗ គឺប្រជាពលរដ្ឋមិនដែលបានជួបលោកស្មៀនឃុំ ដើម្បីបំពេញការស្នើនោះនៅកន្លែងធ្វើការរបស់ខ្លួន ហើយបែរជាប្រើប្រាស់ពេលវេលាក្នុងម៉ោងធ្វើការជូនភ្ញៀវទិញដីធ្លីស្ទើរតែរៀងរាល់ថ្ងៃ។

ដោយ​ឡែក​ជុំវិញករណីនេះដែរ​ នៅរសៀល​ថ្ងៃ​អង្គារ​ទី​២៨​ ខែធ្នូ​ ឆ្នាំ​២០២១នេះ​ អង្គភាព​គេហទំព័រ​នគរដ្រេហ្គន​មិនអាចសុំការទំនាក់ទំនងពី​លោក ហឿង ប៊ុនហេង​ ស្មៀនឃុំព្រែកខ្សាច់​ ខណៈ​ទូរស័ព្ទ​នៅក្រៅតំបន់សេវា៕ ដោយ​៖ស​ តារា​