ខេត្តកំពង់ធំ៖ លោក សុះមុះ សិន រដ្ឋលេខាធិការ ក្រសួងធម្មការ និងសាសនា និងជាប្រធានសមាគមនិស្សិតមុស្លិមកម្ពុជា បានចូករួម ពិធីបិទវគ្គជំនាញកុំព្យូទ័រ និងភាសាអង់គ្លេស ជូនសិស្សានុសិស្សមុស្លិមកម្ពុជា ចំនួន២០០នាក់ ស្ថិតនៅសហគមន៍ស្រុកបារាយណ៍ ខេត្តកំពង់ធំ ដើម្បីចូលរួមកាត់បន្ថយភាពក្រីក្រ ជាមួយរាជរដ្ឋាភិបាល ដែលបានប្រព្រឹត្តទៅកាលពីថ្ងៃទី១៨ ខែមេសា ឆ្នាំ២០១៦ ដោយមានការជួយឧបត្ថម្ភពីអង្គការ Muslimehelfen ដែលមានទីស្នាក់ការ នៅសាធារណរដ្ឋសហព័ន្ធអាល្លឺម៉ង់ ។
លោក សុះ មុះសិន បានបញ្ជាក់ថា៖ ក្រោមកិច្ចសហប្រតិបត្តិការ ក្នុងនាមជាដៃគូអភិវឌ្ឍន៍របស់ សមាគម និស្សិតមុស្លិមកម្ពុជា អង្គការ Muslimehelfen ដែលមានទីស្នាក់ការនៅសាធារណរដ្ឋសហព័ន្ធអាល្លឺម៉ង់ បានផ្តល់គម្រោងវគ្គបណ្តុះបណ្តាលជំនាញកុំព្យូទ័រ និងភាសាអង់គ្លេស ដែលជាគម្រោងផ្នែកអភិវឌ្ឍន៍ធនធានមនុស្ស មួយដ៏សំខាន់ សម្រាប់ប្អូនៗជាសិស្សានុសិស្ស និងអ្នកគ្មានជំនាញនេះអាចចាប់យកចំណេះ ដឹងទាំងនេះទៅប្រើប្រាស់ក្នុងជីវភាពរស់នៅ និងសិក្សាស្រាវជ្រាវផងដែរ។
លោកបន្ដថា៖ គម្រោងវគ្គបណ្តុះបណ្តាលនេះ គឺជាការផ្តល់ដោយឥតគិតថ្លៃ ដោយបានអនុវត្តចំនួន៥ លើករួចមកហើយ ក្រោមជំនួយឧបត្ថម្ភពីអង្គការ Muslimehelfen ដោយមួយលើក ត្រូវចំណាយពេល១២ខែ ចែកចេញជាពីរវគ្គ (០៦ខែក្នុងមួយវគ្គ) ដោយត្រូវចំណាយថវិកាប្រមាណពី១២ពាន់អឺរ៉ូ ទៅ១៥ពាន់អឺរ៉ូ ក្នុងមួយឆ្នាំ លើការតំឡើងប្រព័ន្ធអគ្គិសនី, ម៉ាស៊ីនកុំព្យូទ័រ, ប្រាក់ខែគ្រូ, អ្នកសម្របសម្រួល និងចំណាយរដ្ឋបាលផ្សេងៗ ។ លើកទី១ ទី២ ទី៣ គឺបានបើកជូនសិស្សានុសិស្ស និងនិស្សិត នៅទីរួមខេត្តកំពង់ចាម សរុបសិក្ខាកាម បានចំនួន៤០០នាក់ និង លើកទី៤ ទី៥ និងទី៦ គឺនៅទីនេះតែម្តង ភូមិត្រពាំងឈូក ឃុំបឹង ស្រុកបារាយណ៍ ខេត្តកំពង់ធំ មានសិក្ខាកាមសរុប ចំនួន ៦០០នាក់ ។ ក្រៅពីគម្រោងនានាខាងលើអង្គការ Muslimehelfen ក៏មានគម្រោងសំខាន់ៗ ដូចជា កសាងអគារអន្តេវាសិកដ្ឋាននិស្សិតនារីមុស្លិម ចំនួន ២កន្លែង ដើម្បីបន្តការសិក្សាថ្នាក់ឧត្តមសិក្សានៅរាជធានីភ្នំពេញ គម្រោងទឹកស្អាតតាមជនបទ ការផ្តល់ប្រាក់កម្ចីឥណទាន ឥតការប្រាក់ ដល់ប្រជាពលរដ្ឋរស់នៅក្នុងសហគមន៍ខណ្ឌដូនពេញ និងខណ្ឌជ្រោយចង្វា រាជធានីភ្នំពេញ ការផ្តល់អំណោយសង្គ្រោះបន្ទាន់ដល់ជនរងគ្រោះដោយសារមហន្តរាយ គ្រោះធម្មជាតិ ដូចជា ទឹកជំនន់ ខ្យល់ព្យុះ ភ្លើងឆេះផ្ទះ បានជាងនៅតាមបណ្តា ខេត្ត/រាជធានី និងការផ្តល់ថវិកាសម្រាប់រៀបចំកម្មវិធីស្រាយបួសក្នុង ខែរ៉ាម៉ាដន និងកម្មវិធី Qurban ជារៀងរាល់ឆ្នាំ វគ្គបណ្តុះបណ្តាលវិជ្ជាជីវៈកាត់ដេរ ដោយឥតគិតថ្លៃ នៅខេត្តកំពង់ចាម និងក្រចេះ ។
លោក សុះមុះសិន បានផ្តាំផ្ញើដល់ប្អូនៗសិស្សានុសិស្ស ត្រូវយកចំណេះដឹងនេះទៅប្រើប្រាស់ក្នុងការសិក្សាស្រាវជ្រាវ និងបំពេញ ចំណុចកង្វះខាតរបស់ប្អូនៗ ដើម្បីអភិវឌ្ឍខ្លួនឲ្យក្លាយជាធនធានមនុស្ស ពោពេញដោយសមត្ថភាព ត្រៀមខ្លួនប្រកួតប្រជែងទី ផ្សារការងារពេលបញ្ចប់ការសិក្សា។ លោកក៏បានជម្រុញឲ្យប្អូនៗសិស្សានុសិស្សទាំងអស់ត្រូវខិតខំរៀនសូត្រ ព្រោះឥឡូវ មានតែអ្នកចេះទេទើបប្រលងជាប់ ពិសេសប្អូនៗ ដែលនឹងត្រូវប្រលងមធ្យមសិក្សា បឋមភូមិ និងទុតិយភូមិនាពេលខាងមុខធ្វើយ៉ាងណាប្រលងឲ្យបានជាប់និទ្ទេសល្អ ជាសិស្សពូកែជាដើម។
លោក សុះ មុះ សិន ក៍បានថ្លែងអំណរគុណដល់អង្គការ Muslimehelfen ដែលតែងផ្សារភ្ជាប់ និងជ្រោមជ្រែងដល់សហគមន៍ឥស្លាមនៅកម្ពុជា តាមរយៈការចូលរួមចំណែកផ្តល់ជា គម្រោងអភិវឌ្ឈន៍នានាសំដៅ លើកម្ពស់ជីវភាពរស់នៅរបស់ប្រជាពលរដ្ឋកម្ពុជា និងសូមឲ្យអង្គការនេះបន្តបេសកកម្មរបស់ខ្លួន និងពង្រីកសកម្មភាពឲ្យកាន់តែទូលំទូលាយបន្ដទៀតនៅកម្ពុជា ៕
ដោយ៖ សំរិត
