ភ្នំពេញ៖ ក្មេងទំនើង២នាក់ ត្រូវបានកំលាំងអត្តរាគមន៍ ខណ្ឌសែនសុខឃាត់ខ្លួនប្រគល់ឲ្យប៉ុស្តិ៍នគរបាលភ្នំពេញថ្មី យកមកសាកសួរ ក្រោយពីត្រួតពិនិត្យឃើញមានឧបកណ៍ល្មើសមួយចំនួននៅជាប់ខ្លួន ។
ការឃាត់ខ្លួននេះបានធ្វើឡើងនៅវេលាម៉ោង៤និង០០នាទីទៀបភ្លឺ ថ្ងៃទី១៨ ខែមេសា ឆ្នាំ២០១៦ នៅចំណុចផ្លូវ១០០៣ ក្រុម៧ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
សមត្ថកិច្ចប្រាប់ថា ជនសង្ស័យទី១ ឈ្មោះ មាស វុទ្ធី ភេទប្រុស អាយុ៣៦ឆ្នាំ មុខរបរកម្មករសំណង់ ស្នាក់នៅសង្កាត់ស្រះចក ខណ្ឌដូនពេញ និងទី២ឈ្មោះ អ៊ុក ផា ភេទប្រុស អាយុ២២ឆ្នាំ មុខរបរជាងពិដាន ស្នាក់នៅសង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ ។
ប្រភពពីសមត្ថកិច្ចបានឱ្យដឹងថា មុនឃាត់ខ្លួនជនសង្ស័យខាងលើ ខណៈដែលកំលាំងអត្តរាគមន៍ខណ្ឌសែនសុខកំពុងល្បាតនៅគោលដៅខាងលើ បានឃើញជនសង្ស័យជិះម៉ូតូមួយគ្រឿងម៉ាកហ្សូមមឺរ ពណ៌ទឹកប្រាក់ មិនមានស្លាកលេខ ឌុបគ្នាគួរអោយសង្ស័យ ក៏ហៅអោយឈប់ត្រួតពិនិត្យ ក៏ឃើញក្នុងហោប៉ៅខោ ឈ្មោះ អ៊ុក ផា មានលាក់ទុកសម្ភារល្មើសមួយចំនួន ក៏ឃាត់យកមកសាកសួរនៅប៉ុស្តិ៍នគរបាលរដ្ឋបាលភ្នំពេញថ្មី ដើម្បីសាកសួរ ។
ក្នុងករណីខាងលើនេះ នគរបាលប៉ុស្តិ៍ភ្នំពេញថ្មីបានដកហូតសោខ្សៀលេខ៨ចំនួន១ ដែកលួសឆ្នៃចំនួន១ ដែកចុងស្រួចចំនួន២ ទួលឡឺវីសចំនួន១ និងដកហូតម៉ូតូ ម៉ាកហ្សូមមឺរ ពណ៌ទឹកប្រាក់ អត់ស្លាកលេខ មួយគ្រឿង ។
បច្ចុប្បន្ន ជនសង្ស័យទាំង២នាក់ កំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌសែនសុខ ៕
ដោយ៖ តុង សីហា
