ខេត្តបាត់ដំបង ៖ អគ្គិភ័យមួយ បានឆាបឆេះផ្ទះប្រជាពលរដ្ឋបង្កការភ្ញាក់ផ្អើល នាល្ងាចថ្ងៃទី ៨ ខែមករា ឆ្នាំ ២០២១ នៅភូមិវត្តរំដួល សង្កាត់ចំការសំរោង ក្រុងបាត់ដំបង បំផ្លាញផ្ទះឈើ៣ខ្នងនិងទ្រព្យសម្បត្តិជាច្រើន។
មន្រ្តីនគរបាលប៉ុស្តិ៍ចំការសំរោងបានឲ្យដឹងថា ផ្ទះ បងប្អូន ប្រជាពលរដ្ឋអស់ចំនួន៣ខ្នង ដែលបំផ្លាញដោយអគ្គិភ័យនេះជាកម្មសិទ្ធរបស់ ១. ឈ្មោះ លឹម សុវ៉ាន់ ភេទប្រុស ផ្ទះទំហំ ៧ម៉ែត្រ ×៨ ម៉ែត្រ ធ្វើអំពីឈើឆេះអស់ទាំងស្រុង (ផ្ទះបង្កហេតុ) ។
២. ឈ្មោះ ចាន់ ហួត ភេទប្រុស អាយុ ៦២ ឆ្នាំ ទំហំ ១២ម៉ែត្រ×១៥ ម៉ែត្រ ធ្វើអំពីឈើ ឆេះទាំងស្រុង (ឆ្លងពីផ្ទះឈ្មោះ លឹម សុវ៉ាន់) ។
៣. ឈ្មោះ ហេង កុម្ភះ ភេទស្រី អាយុ ៣៣ ឆ្នាំ ទំហំ ៥ម៉ែត្រ×១៣ ម៉ែត្រ ផ្ទះទៀមជញ្ជាំងថ្មឆេះរោល (ឆ្លងពីផ្ទះឈ្មោះ លឹម សុវ៉ាន់) ។
តាមការបញ្ជាក់ពីអ្នកជិតខាងបានឲ្យដឹងថា អគ្គិភ័យនេះកើតចេញពីផ្ទះឈ្មោះ លឹម សុវ៉ាន់ ដោយសារម្ចាស់ផ្ទះថា្លទុកចោល ធ្វើឲ្យផ្ទុះចង្រ្កានហ្គាសក្លាយជាអគ្គិភ័យពេញបន្ទុកតែម្តង តែក្នុងហេតុការណ៍នេះ ពុំមានគ្រោះថ្នាក់ដល់មនុស្សទេ ។
ប្រភពដដែលបានឲ្យដឹងទៀតថា ពេលមានអគ្គិភ័យនេះកើតឡើង សមត្ថកិច្ចបានចេញរថយន្តពន្លត់អគ្គិភ័យចំនួន០៥គ្រឿងរួមមាន៖ រថយន្តរបស់ស្នងការដ្ឋាននគរបាលខេត្តបាត់ដំបងចំនួន ០៣គ្រឿង ។
រថយន្តរបស់អធិការដ្នាននគរបាលស្រុកសង្កែចំនួន០១ គ្រឿង ។ រថយន្តរបស់អធិការដ្ឋានស្រុកឯកភ្នំចំនួន ០១ គ្រឿង ដោយបានប្រើប្រាស់ទឹកអស់ចំនួន០៩ រថយន្តផងដែរទើបភ្លើងរលត់ជាស្ថាពរ ។ រីឯទំហំនៃការខូចខាតមានប្រមាណជាង៥ម៉ឺនដុល្លារ៕
ដោយ÷ប្រាថ្នា
