ខេត្តកំពត៖ បេីយោងតាមប្រភពព័ត៍មានពីក្រសួងបរិស្ថាន នៅរសៀលថ្ងៃចន្ទទី១៧ ខែមករា ឆ្នាំ២០២២នេះ បានឱ្យដឹងថា ការចុះពិនិត្យទីតាំងស្នើសុំគម្រោងវិនិយោគអេកូទេសចរណ៍ខ្នាតតូចទំហំមិនលើស១០ហិកតា ចំនួន១គម្រោង និងចុះកំណត់បោះព្រំប្រទល់ដីវិនិយោគគម្រោងអភិវឌ្ឍន៍ទេសចរណ៍ធម្មជាតិផ្ទៃដីមិនលើសដប់ហិកតាចំនួន ៦គម្រោង។
ប្រភពដដែលបន្តថា លោកស្រី ម៉ុម ថានី រដ្ឋលេខាធិការ,លោក នេត្រ ភក្ត្រា រដ្ឋលេខាធិការនៃក្រសួងបរិស្ថាន បានដឹកនាំក្រុមការងារក្រសួងបរិស្ថាន និងមានការចូលរួមពីតំណាងរដ្ឋបាលខេត្តកំពត និងក្រុមហ៊ុន សរុបប្រមាណ១៩រូប កាលពីថ្ងៃទី១៦ ខែមករា ឆ្នាំ២០២២ ចុះពិនិត្យទីតាំងជាក់ស្តែង និងប្រជុំពិភាក្សាលើគម្រោងអភិវឌ្ឍន៍ទេសចរណ៍ធម្មជាតិដែលមានផ្ទៃដីទំហំមិនលើស ១០ហិកតា ចំនួន ០១គម្រោង និងចុះកំណត់ព្រំប្រទល់ដីវិនិយោគគម្រោងអភិវឌ្ឍន៍ទេសចរណ៍ធម្មជាតិផ្ទៃដីមិនលើសដប់ហិកតាចំនួន ៦គម្រោងទៀតស្ថិតក្នុងឧទ្យានជាតិព្រះមុនីវង្ស បូកគោ ក្នុងភូមិសាស្ត្រភូមិព្រែកអំពិល សង្កាត់កោះតូច ក្រុងបូកគោ។
គួរបញ្ជាក់ថា ការចុះពិនិត្យទីតាំងស្នើសុំគម្រោងវិនិយោគអេកូទេសចរណ៍ខ្នាតតូចខាងលេីនេះ ក្នុងគោលបំណងដើម្បីសិក្សាជាក់ស្តែងលើទីតាំងស្នើសុំវិនិយោគ និងដើម្បីចុះកំណត់ការបោះបង្គោលព្រំប្រទល់ដីលើទីតាំងគម្រោងទាំង៧ ខាងលើ៕
ដោយ៖សហការី
