ភ្នំពេញ ៖ នៅរសៀលថ្ងៃទី២០ ខែមករា ឆ្នាំ២០២២ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានបញ្ជាក់អោយដឹងថា, ស្ពៃក្តោបរបស់សហគមន៍តំបន់ការពារធម្មជាតិទន្សោងកោះញែក ស្ថិតក្និងស្រុកកោះញែក ខេត្តមណ្ឌលគិរី។ ប្រជាសហគមន៍ដែលបានប្រកបរបរដាំបន្លែនៅសហគមន៍នេះ ភាគច្រើនជាអ្នកធ្លាប់មានមុខរបរចូលព្រៃកាប់ឈើ និងព្រានព្រៃដាក់អន្ទាក់ចាប់សត្វ និងប្រមាញ់សត្វព្រៃ។
លោករដ្ឋលេខាធិការបានបន្តថា, ពួកគាត់បានប្រាប់ខ្ញុំថាពេលប្រកបរបរចូលព្រៃកាប់ឈើ ទន្ទឹមនឹងប្រឈមមុខច្បាប់ ក៏មិនមានសល់ប្រាក់កាសអ្វីទេព្រោះពេលចូលព្រៃត្រូវខ្ចីប្រាក់គេដើម្បីឱ្យគ្រួសារនិងខ្លួនឯងចាយ ហើយកូនៗក៏មិនបានទៅរៀនដែរ។ ប៉ុន្តែពេលមានមុខរបរនៅផ្ទះ ដាំបន្លែបង្ការផ្គត់ផ្គង់ទីផ្សារ ពួកគាត់មានជីវភាពល្អ កូនៗបានទៅរៀនសូត្រ មានបន្លែបង្ការហូប និងលក់បានថវិកា និងមិនប្រឈមមុខជាមួយនឹងការអនុវត្តច្បាប់របស់សមត្ថកិច្ច។ បច្ចុប្បន្នបន្លែរបស់គាត់បានផ្គត់ផ្គង់តម្រូវការនៅខេត្តមណ្ឌលគិរី។ បងប្អូនធ្លាប់អញ្ជើញទៅមណ្ឌលគិរីធ្លាប់បានភ្លក្សរសជាតិឆាស្ពៅក្តោបមណ្ឌលគិរីហើយ ដឹងថារសជាតិឆ្ងាញ់យ៉ាងណា។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានគូសបញ្ជាក់ថា, នេះគឺជាផ្នែកមួយនៃការចូលរួមបង្កើតសេដ្ឋកិច្ចមូលដ្ឋាន បង្កើតការងារ បង្កើតចំណូលជូនពលរដ្ឋ ជាយុទ្ធសាស្ត្រក្នុងការដោះស្រាយបញ្ហា និងការកាត់បន្ថយសម្ពាធលើធនធានធម្មជាតិ ជាពិសេសទប់ស្កាត់បទល្មើសធនធានធម្មជាតិ ដោយសារតែតម្រូវការក្នុងជីវភាព៕
ដោយ : សិលា
