កីឡាករបាល់ទាត់ប្រេស៊ីល Robinho បានចាញ់ក្តីក្នុងការប្តឹងឧទ្ធរណ៍ចុងក្រោយរបស់គាត់ប្រឆាំងនឹងការផ្តន្ទាទោសសម្រាប់ការចូលរួមក្នុងការរំលោភបូកលើស្ត្រីនៅទីក្រុង Milan កាលពីឆ្នាំ២០១៣។ កាល​ពី​ថ្ងៃព្រសហ្បតិ៍ តុលាការ​កំពូល​ក្នុង​ទីក្រុង​រ៉ូម​បាន​តម្កល់​សាលក្រម​មុន​ដែល​កាត់​ទោស​កីឡាករ​វ័យ៣៧ឆ្នាំ​រូបនេះឲ្យ​ជាប់​ពន្ធនាគារ៩ឆ្នាំ។

ក្នុងឆ្នាំ២០១៧ Robinho និងជនជាតិប្រេស៊ីល៥នាក់ផ្សេងទៀតត្រូវបានគេរកឃើញថា មានពិរុទ្ធពីបទរំលោភលើស្ត្រីជនជាតិអាល់បានីអាយុ២២ឆ្នាំនៅក្នុងក្លិបរាត្រីមួយ។ ការកាត់ទោសនេះត្រូវបានតម្កល់កាលពីខែធ្នូ ឆ្នាំ២០២០បន្ទាប់ពីការប្តឹងឧទ្ធរណ៍។Robinho ទំនង​ជា​មិន​ទទួល​ទោស​គាត់​ទេ ខណៈ​គាត់​នៅ​ក្នុង​ប្រទេស​ប្រេស៊ីល ហើយ​រដ្ឋធម្មនុញ្ញ​ប្រេស៊ីល​ហាម​ឃាត់​ការ​ធ្វើ​បត្យាប័ន​ពលរដ្ឋ​ខ្លួន បើ​ទោះ​បី​អ៊ីតាលី​អាច​ស្នើ​ឲ្យ​គាត់​អនុវត្ត​ទោស​នៅ​ក្នុង​ប្រទេស​អាមេរិក​ខាង​ត្បូង​ក៏​ដោយ។Robinho ដែលលេងបាន១០០ប្រកួតឲ្យក្រុមប្រេស៊ីលបានចាប់ផ្តើមអាជីពរបស់គាត់នៅក្រុម Santos មុនពេលផ្លាស់ទៅក្លិប Real Madrid ក្នុងឆ្នាំ២០០៥ជាកន្លែងដែលគាត់បានឈ្នះពានរង្វាន់ La Ligaចំនួន២ក្នុងរយៈពេល៤រដូវកាល។ ក្នុងឆ្នាំ២០០៨ គាត់បានចូលរួមជាមួយ Manchester City ក្នុងតម្លៃ៣២.៥លានផោនដែលជាតម្លៃកំណត់ត្រានៅអង់គ្លេស ប៉ុន្តែគាត់ត្រូវបានខ្ចីជើងទៅក្លិប Santos ក្នុងខែមករា ឆ្នាំ២០១០ បន្ទាប់ពីព្យាយាមបង្កើតស្នាដៃនៅក្នុងប្រទេសអង់គ្លេស។គាត់បានជួយក្រុមឈ្នះ Serie A កំឡុងពេលលេងជាបន្តបន្ទាប់នៅក្លិប AC Milan ប៉ុន្តែបានត្រលប់ទៅក្រុម Santos វិញក្នុងលក្ខខណ្ឌខ្ចីជើងក្នុងខែសីហា ឆ្នាំ២០១៤ មុនពេលចូលរួមជាមួយក្លិបចិន Guangzhou Evergrande ក្នុងខែកក្កដា ឆ្នាំ២០១៥។នៅពេលដែលកិច្ចសន្យារយៈពេល៦ខែរបស់គាត់បានផុតកំណត់ គាត់បានត្រលប់ទៅប្រេស៊ីលវិញដោយចូលរួមជាមួយក្រុម Atletico Mineiro ក្នុងកិច្ចសន្យារយៈពេល២ឆ្នាំ និងបានប្រកបអាជីពនៅក្លិបទួរគីចំនួន២ឆ្នាំ មុនពេលត្រលប់ទៅក្លិបដើម Santos ក្នុងខែតុលា ឆ្នាំ២០២០ក្នុងកិច្ចសន្យារយៈពេល៥ខែ។

ទោះជាយ៉ាងណាក៏ដោយបន្ទាប់ពីការចុះហត្ថលេខារបស់គាត់ត្រូវបានជួបជាមួយនឹងការរិះគន់ ក្លិបប្រេស៊ីលបានព្យួរកិច្ចសន្យារបស់គាត់ ដើម្បីឱ្យកីឡាករផ្តោតទាំងស្រុងលើការការពារក្តីរបស់គាត់នៅក្នុងករណីដែលកំពុងបន្តនៅប្រទេសអ៊ីតាលី ៕ (រូបភាព ៖ BBC Sport)