ក្រុមជម្រើសជាតិប្រទេស Burkina Faso បានយកឈ្នះក្រុមជម្រើសជាតិGabon ដែលមានគ្នា១០នាក់ដោយបាល់ប៉េណាល់ទីដើម្បីឈានដល់វគ្គ៨ក្រុមចុងក្រោយ ឬ ១/៤ផ្តាច់ព្រ័ត្រក្នុងពានរង្វាន់ Africa Cup of Nations ក្នុងប្រទេស Cameroon បន្ទាប់ពីស្មើ ១-១។

Ismahila Ouedraogo បានស៊ុតបាល់បញ្ចូលទីឱ្យក្រុម Burkina Faso ឈ្នះបាល់ប៉េណាល់ទីក្នុងលទ្ធផល៧ទល់៦។ ក្រុមហ្គាបុងត្រូវអាជ្ញាកណ្តាលបណ្តេញកីឡាករ Sidney Obissa ចេញនៅពាក់កណ្តាលតង់ទី២ ប៉ុន្តែបានរកបានគ្រាប់បាល់តាមស្មើវិញក្នុងម៉ោងបន្ថែម នៅពេលដែលការតែតបាល់របស់ Bruno Ecuele Manga បានទៅប៉ះនឹងកីឡាករ Adama Guira ចូលទីខ្លួនឯង។ ប្រធានក្រុម Burkina Faso កីឡាករ Bertrand Traore បានខកខានស៊ុតបាល់ប៉េណាល់ទី មុនពេលស៊ុតបញ្ចូលទីនៅនាទីទី២៨។ក្រុម Burkina Faso នឹង​ប៉ះ​ទុយនីស៊ី ដែល​បាន​យក​ឈ្នះ​នីហ្សេរីយ៉ា ១-០នៅ​ពេល​ប្រកួតក្នុងថ្ងៃ​អាទិត្យជាមួយគ្នា ក្នុង​វគ្គ​៨ក្រុម​ចុងក្រោយ​នៅ​ថ្ងៃ​សៅរ៍ ទី២៩ ខែ​មករាខាងមុខនេះ។

ការប្រកួតជម្រុះវគ្គ១៦ក្រុមនៅរាត្រីថ្ងៃទី២៤ មករានេះមាន២គូទៀតក្នុងការប្រជែងយកពានរង្វាន់ Africa Cup of Nations គឺក្រុមហ្គីណេ ប៉ះក្រុមហ្គាំប៊ីនៅម៉ោង១១យប់ និងក្រុមកាមេរូន ប៉ះក្រុមកូម៉ូរ៉ូសនៅម៉ោង២រំលងអធ្រាត្រ។ ក្រុមណាដែលឈ្នះនឹងត្រូវប៉ះគ្នានៅវគ្គ៨ក្រុមចុងក្រោយ ដែលពានរង្វាន់នេះកំពុងធ្វើឡើងនៅប្រទេសកាមេរូនជាម្ចាស់ផ្ទះ ៕ (រូបភាព ៖ BBC Sport)