ភ្នំពេញ ៖ មានហេតុការណ៍គ្រោះថ្នាក់ចរាចរណ៍ដ៏រន្ធត់មួយធ្វេីឲ្យបុរសម្នាក់បែកក្បាលនិងបាក់កស្លាប់ចោលប្រពន្ធនិងកូនឱ្យនៅកំព្រា បន្ទាប់ពីជនរងគ្រោះជិះម៉ូតូចេញពីធ្វើការត្រលប់ទៅផ្ទះវិញក្នុងល្បឿនលឿនខ្វះការប្រុងប្រយ័ត្នបានជ្រុលទៅបុកគូទរថយន្តហុីយ៉ាន់ដាយពីក្រោយដែលកំពុងតែឈប់ភ្លើងស្តុបយ៉ាងពេញទំហឹង កាលពីវេលាម៉ោង៩យប់ និង២០នាទីយប់ថ្ងៃអង្គារទី៨ ខែកុម្ភៈ ឆ្នាំ២០២២ ស្ថិតនៅចំណុចភ្លើងស្តុបវត្តស្លែង តាមបណ្ដោយផ្លូវជាតិលេខ៣ ក្នុងភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ។
សពជនរងគ្រោះ មានឈ្មោះ ម៉ៅ ចិត្ត ភេទប្រុស អាយុ៣៥ឆ្នាំ មុខរបរមេជាងជួសជុលរថយន្ត ស្នាក់នៅផ្ទះជួលក្នុងភូមិបឹងធំ សង្កាត់ប្រទះឡាង ខណ្ឌដង្កោ មានស្រុកកំណើតនៅភូមិកណ្ដាលកេីប ឃុំរលាំងគ្រេីល ស្រុកសំរោងទង ខេត្តកំពង់ស្ពឺ ជិះម៉ូតូម៉ាកហុងដាឌ្រីម ស៊េរីឆ្នាំ ២០១៩ ពណ៌ខ្មៅ ពាក់ស្លាកលេខ ភ្នំពេញ 1HI-3293 ។
ដោយឡែកអ្នកបេីកបររថយន្តវិញមានឈ្មោះ ហ៊ុយ ឡេង ភេទប្រុស អាយុ៤១ឆ្នាំ មុខរបរបេីកបររថយន្ត មានស្រុកកំណើតនៅខេត្តព្រះសីហនុ ជាអ្នកបេីក រថយន្តម៉ាកហ៊ីយ៉ាន់ដាយ ពណ៌ទឹកប៊ិក ពាក់ស្លាកលេខ ព្រះសីហនុ 2A-8056។
បេីតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកេីតហេតុគេឃើញបុរសម្នាក់បេីករថយន្តម៉ាកហ៊ីយ៉ាន់ដាយដឹកទំនិញចំណុះ១តោនកន្លះ ពណ៌ទឹកប៊ិក ធ្វើដំណើរតាមបណ្ដោយផ្លូវជាតិលេខ៣ ក្នុងទិសដៅពីលិចទៅកេីត លុះមកដល់ចំណុចកេីតហេតុក៏ឈប់រង់ចាំភ្លេីងពណ៌ខៀវ គាប់ជួនពេលនោះស្រាប់តែមានបុរសម្នាក់ជិះម៉ូតូម៉ាកហុងដាឌ្រីម ស៊េរីឆ្នាំ២០២១ ពណ៌ខ្មៅ ធ្វើដំណើរមកពីក្រោយក្នុងល្បឿនលឿនបានជ្រុលទៅបុកគូទរថយន្តពីក្រោយដែលកំពុងតែឈប់ភ្លើងស្តុបពេញទំហឹង បណ្តាលឱ្យបោកបែកក្បាល និងបាក់កស្លាប់ភ្លាមៗនៅកន្លែងកើតហេតុតែម្តង ។
ដោយឡែកខាងរថយន្តវិញបានវៀចកាងផែ្នកខាងក្រោយបន្តិចបន្តួច ហេីយអ្នកបេីកបរក៏ត្រូវសមត្ថកិច្ចដែលយាមគោលដៅឃាត់ខ្លួនទុករង់ចាំប្រគល់ឱ្យសមត្ថកិច្ចជំនាញចរាចរណ៍រាជធានីផងដែរ ។
ក្រោយកេីតហេតុ សមត្ថកិច្ចមូលដ្ឋានបានធ្វើការទាក់ទងទៅក្រុមគ្រួសារសាច់ញាតិសពឱ្យមកកន្លែងកេីតហេតុដេីម្បីទទួលសពយកទៅធ្វេីបុណ្យតាមប្រពៃណី ។ តែអ្វីដែលឃេីញជាក់ស្ដែងនោះគឺពេលប្រពន្ធនិងក្រុមគ្រួសារមកដល់ឃេីញសពជនរងគ្រោះហេីយក៏ស្រែកទ្រហោយំបោកខ្លួនរហូតដល់សន្លប់បាត់ស្មារតី ។ បន្ទាប់មកទេីបសមត្ថកិច្ចជំនាញធ្វើលិខិតប្រគល់សពឱ្យទៅសាច់ញាតិយកទៅធ្វើបុណ្យតាមប្រពៃណី។ រីឯម៉ូតូនិងរថយន្តរួមទាំងអ្នកបេីកបរ ត្រូវសមត្ថកិច្ចធ្វើការវាស់វែងនិងយកទៅការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញរង់ចាំដោះស្រាយតាមក្រោយ ៕
ដោយ ៖ ភារ៉ា ដង្កោ
