ភ្នំពេញ៖ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានថ្លែងនៅលេីបណ្ដាញសង្គមហ្វេសប៊ុកផ្លូវការ នៅរសៀលថ្ងៃពុធទី០៩ ខែកុម្ភៈ ឆ្នាំ២០២២នេះថា៖” នៅព្រឹកនេះ ខ្ញុំបានធ្វើបទបង្ហាញ ស្ដីពីសភាពការណ៍ពិភពលោក និងគោលនយោបាយការបរទេសកម្ពុជា ជូនដល់គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការនិងព័ត៌មាន និងប្រធាននៃគណៈកម្មការទាំង ៩ ទៀត នៃព្រឹទ្ធសភាកម្ពុជា។
លោក ប្រាក់ សុខុន បានថ្លែងបន្តថា ខ្ញុំបានផ្តោតលើផ្នែកសំខាន់ៗមួយចំនួននៃការងារការបរទេស និងសហប្រតិបតិ្តការអន្តរជាតិរបស់កម្ពុជា ក្នុងនោះរួមមាន ការប្រឈមជាយុទ្ធសាស្ត្រ កម្ពុជាក្នុងឋានៈជាប្រធានអាស៊ានឆ្នាំ២០២២ និងការលើកកម្ពស់ប្រសិទ្ធិភាពការងារការទូត។
បន្ថែមពីនេះ លោកឧបនាយករដ្ឋមន្ត្រី បានបញ្ជាក់ទៀតថា ខ្ញុំក៏ពិតជារីករាយណាស់ដែលបានជួបសំណេះសំណាលជាមួយ ឯកឧត្តម លោកជំទាវ នៅព្រឹទ្ធសភា ដែលខ្ញុំធ្លាប់បានស្គាល់ដោយផ្ទាល់ និងសូមកោតសរសើរដោយស្មោះ ចំពោះការពលី និងការរួមចំណែករបស់គាត់ដើម្បីបុព្វហេតុជាតិយើង។ ខ្ញុំក៏បាននាំយក សៀវភៅកេរដំណែលស្នាដៃម្ហូបខ្មែរ ជាវត្ថុអនុស្សាវរីយខ្លះដើម្បីជូនពួកគាត់៕ដោយ៖ស តារា
