ភ្នំពេញ ៖ បុរសជាអ្នករត់ឡំប្រឺតាម្នាក់បានដឹកជនជាតិចិន៣នាក់ ហើយស្រាប់តែមានបុរសជជនជាតិចិនម្នាក់ក្នុងចំណោម៣នាក់នោះបានខ្យល់គរស្លាប់នៅលើឡំប្រឺតានោះតែម្ដង បង្កឱ្យមានការភ្ញាក់ផ្អើលជាខ្លាំងនៅព្រឹកថ្ងៃទី១០ ខែកុម្ភៈ ឆ្នាំ២០២២ នៅចំណុចទល់មុខវត្តចង្ក្រានតាព្រហ្ម ហៅវត្តស្ទឹងមានជ័យ ស្ថិតនៅតាមបណ្តោយផ្លូវលេខ២១៧ ក្នុងសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
បុរសជនជាតិចិនរងគ្រោះខាងលើមានអាយុ២៣ឆ្នាំ រីឯ២នាក់ទៀតដែលនៅរស់ គឺជាមិត្តភក្តិរបស់ពួកគេក៏មានអាយុស្រករៗគ្នាដែរ។
តាមប្រភពពីបុរសម្នាក់ជាអ្នករត់ឡំប្រឺតាខាងលើនេះបានប្រាប់ឱ្យដឹងថា នៅវេលាម៉ោង៥ព្រឹកព្រលឹមថ្ងៃទី១០ ខែកុម្ភៈនេះ ពួកគេបានហៅឡំប្រឺតារបស់គាត់ជិះ ដោយពេលនោះបុរសជាជាតិចិនទាំង២នាក់បានគ្រាហ៍បុរសជនជាតិចិនរងគ្រោះឡើងលើឡំប្រឺតា ដោយគាត់ជាម្ចាស់ឡំប្រឺតាគិតថាទំនងជាជនរងគ្រោះស្រវឹង ឬខ្លាចមានបញ្ហាអ្វីផ្សេងក៏បានបដិសេធមិនព្រមដឹកបុរសជនជាតិចិនទាំង៣នាក់នោះទេ ប៉ុន្តែត្រូវបានបុរសជនជាតិចិនខាងលើមិនព្រមចុះពីលើឡំប្រឺតាដូចគ្នា ហើយនិយាយជាភាសាចិនមកកាន់រូបគាត់ទៀតផង ។
ប្រភពដដែលបន្តថា ដោយសារតែស្តាប់ភាសាចិនមិននោះ រូបគាត់ជាអ្នករត់ឡំប្រឺតាក៏យល់ព្រមដឹក ហើយជនជាតិចិនខាងលើក៏បានហុចទូរស័ព្ទឱ្យដឹកទៅតាមផែនទី ( Location ) ដែលបានលោត ។ ពេលដឹកតាមផែនទីក្នុងទូរស័ព្ទហើយនោះ ក៏បានទៅដល់ចំណុចមុខវត្តស្ទឹងមានជ័យ ហើយពេលទៅដល់ទីនោះ បុរសរងគ្រោះដែលបាត់បង់ស្មារតីនោះក៏បានស្លាប់តែម្តងធ្វើឱ្យបុរសជនជាតិចិនទាំង២នាក់ដែលជាមិត្តភក្តិបានឆោឡោ បង្កឱ្យមានការភ្ញាក់ផ្អើលដល់សមត្ថកិច្ចចុះមកដល់ទីតាំងខាងលើ និងបានដឹកសពចូលទៅក្នុងវត្តជាបណ្តោះអាសន្ន ដើម្បីរង់ចាំព្រឹកឡើងនឹងធ្វើកោសល្យវិច័យ ។
បេីតាមប្រភពដដែលបន្តទៀតថា លុះដល់វេលាព្រឹកឡើង កម្លាំងសមត្ថកិច្ចជំនាញផ្នែកកោសល្យវិច័យក៏បានចុះមកធ្វើការពិនិត្យយ៉ាងល្អិតល្អន់ហើយបានបញ្ជាក់ថាជនរងគ្រោះស្លាប់ដោយសារជំងឺបេះដូង ហើយខ្យល់គរស្លាប់តែម្តង ពុំមែនជាករណីអ្វីផ្សេងឡើយ ។
សមត្ថកិច្ចខណ្ឌមានជ័យបានឱ្យដឹងថា បន្ទាប់ពីធ្វើការសាកសួរទៅលើជនជាតិចិន២នាក់ជាមិត្តភក្តិតាមរយៈការជួយបកប្រែភាសាផង បានឆ្លើយបំភ្លឺថា នៅមុនកើតហេតុ ជនរងគ្រោះមានអាការៈចុកឆ្អល់ និងថប់ៗដង្ហើម ហើយក៏បានឱ្យពួកគេទាំង២នាក់ជួយជូនទៅពេទ្យ លុះពេលកំពុងធ្វើដំណើរនៅលើឡំប្រឺតានោះ ក៏ស្រាប់តែដាច់ខ្យល់ស្លាប់តែម្តង ។
បច្ចុប្បន្ននេះ សពជនរងគ្រោះត្រូវបានតម្កល់នៅវត្តស្ទឹងមានជ័យ រង់ចាំសាច់ញាតិមកទទួលយកទៅធ្វើបុណ្យ ។ ចំណែកឯមិត្តភក្តិរបស់គេទាំង២នាក់ និងបុរសជាម្ចាស់ឡំប្រឺតាត្រូវអនុញ្ញាតឱ្យត្រឡប់ទៅវិញ ព្រោះពុំមានជាប់ពាក់ព័ន្ធនឹងការស្លាប់របស់ជនរងគ្រោះឡើយ ៕ដោយ ៖ ភារ៉ា ដង្កោ
