ខេត្តប៉ៃលិន៖ លោកស្រី ហ៊ុន ដានី រដ្ឋលេខាធិការក្រសួងទេសចរណ៍ អមដំណើរដោយលោក ឃ្លោក នួយ អភិបាលរងខេត្ត លោកប្រធានមន្ទីរទេសចរណ៍ខេត្ត និងមន្ត្រីពាក់ព័ន្ធមួយចំនួន បានអញ្ជើញធ្វើទស្សនកិច្ចនៅរមណីយដ្ឋានទេសចរណ៍ទឹកធ្លាក់ភ្នំខៀវ។ នេះបេីយោងតាមប្រភពព័ត៍មានពីក្រសួងទេសចរណ៍ បានឱ្យដឹងនៅរសៀលថ្ងៃសៅរ៍ទី១៩ ខែកុម្ភៈ ឆ្នាំ២០២២។
សូមជម្រាបថា រមណីយដ្ឋានទឹកធ្លាក់ភ្នំខៀវ ឬអូរតាវ៉ៅ ជារមណីយដ្ឋានទេសចរណ៍ ដ៏ល្បីល្បាញមួយរបស់ខេត្តប៉ៃលិន មានទីតាំងស្ថិតនៅ ភូមិខ្លុង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន និងមានចម្ងាយប្រមាណ៩គីឡូម៉ែត្រ ពីរូបសំណាកលោកយាយយ៉ាត។ រមណីយដ្ឋាននេះ ជារមណីយដ្ឋានបែបធម្មជាតិដែលមានជ្រោះ ភ្នំ ព្រៃព្រឹក្សាខៀវស្រងាត់ ខ្យល់អាកាសបរិសុទ្ធ ជាពិសេសទឹកធ្លាក់ថ្លាយង់គួរឲ្យគយគន់ចង់លេងកម្សាន្ត។
រមណីយដ្ឋានទឹកធ្លាក់ភ្នំខៀវ ក៏មានកន្លែងសម្រាកទទួលទានអាហារឆ្ងាញ់ៗនៅក្បែរនោះ ហើយដោយសារតែតំបន់ទេសចរណ៍មួយនេះមានចម្ងាយមិនសូវឆ្ងាយពីក្រុង គួបផ្សំរមណីយដ្ឋានដ៏ស្រស់ស្អាតផងដែរនោះ ទើបធ្វើឲ្យតំបន់មួយនេះអាចទាក់ទាញភ្ញៀវទេសចរជាតិ និងអន្តរជាតិបានយ៉ាងច្រើន។
ក្រោយទទួលទានអាហារថ្ងៃត្រង់ ទេសចរជាច្រើន តែងតែចុះទៅងូតទឹកដ៏សែនត្រជាក់នៅទីនោះ ដែលគេបានឲ្យនាមថា “ទឹកធ្លាក់ ៧ ដំណាក់”។ ទឹកធ្លាក់ភ្នំខៀវមានកម្ពស់ប្រមាណជាង ២គីឡូម៉ែត្រ បើមើលតាមជាក់ស្តែងទឹកធ្លាក់ ៧ដំណាក់ ពិតជាស័ក្តិសមនឹងឈ្មោះមែន ព្រោះទឹកដែលហូរធ្លាក់ពីលើមកមានកម្ពស់ប្រហែលជា ២គីឡូម៉ែត្រ ត្រូវហូរកាត់ផ្ទាំងថ្មចំនួន ៧ ដំណាក់។
ក្រសួងទេសចរណ៍ បានបន្ថែមថា ដោយសារតែភាពទិដ្ឋភាពដ៏ស្រស់បំព្រងនៃរមណីយដ្ឋាន ទឹកធ្លាក់ភ្នំខៀវនេះហើយ បានជាធ្វើឲ្យភ្ញៀវទេសចរជាតិ និងអន្តរជាតិ រមែងនឹកដល់ដំណើរទេសចរណ៍មកកាន់ទឹកដីខេត្តប៉ៃលិននេះ។
ដោយឡែកបើតាមការឱ្យដឹងរបស់លោកប្រធានមន្ទីរទេសចរណ៍ខេត្តថា៖ បច្ចុប្បន្នរដ្ឋបាលខេត្តបាននិងកំពុងយកចិត្តទុកដាក់ក្នុងការជួសជុល កែលម្អតំបន់គោលដៅទេសចរណ៍ក្នុងខេត្ត និងអភិវឌ្ឍផលិតផលទេសចរណ៍ថ្មីៗដើម្បីទាក់ទាញភ្ញៀវទេសចរបន្ថែមទៀត៕
ដោយ៖សហការី
