ភ្នំពេញ៖ បុរសម្នាក់ត្រូវបានឪពុកម្តាយក្មេងស្រីប្តឹងនគរបាលឲ្យឃាត់ខ្លួនដោយចោទប្រកាន់ បៀតបៀនកេរ្តិ៍ខ្មាស់ ក្មេងស្រី ស្នាក់នៅបន្ទប់ជាប់គ្នា ក្រោយពីផឹកស្រវឹង ឈ្លោះប្រកែកប្តីប្រពន្ធ​ ហើយឡើងទៅសំងំស្ទាប់ប្រដាប់ភេទក្មេងស្រីត្រូវឪពុកម្តាយក្មេងរងគ្រោះដឹងខ្លួន ស្រែកផ្អើលអ្នកជិតខាង កាលពីវេលាម៉ោង៧ព្រឹកថ្ងៃទី២៥ ខែមេសា ឆ្នាំ២០១៦ ស្ថិតនៅផ្ទះជួល ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។

បុរសរងការចោទប្រកាន់បទបៀតបៀនកេរ្តិ៍ខ្មាស់ មានឈ្មោះ យ៉ាន សុគន្ធ អាយុ៣៦ឆ្នាំ មុខរបរ រត់ម៉ូតូឌុប ស្នាក់នៅបន្ទប់ជួល ផ្ទះកើតហេតុខាងលើ មានស្រុកកំណើតភូមិស្នេហ៍រាន ឃុំបឹងព្រះ ស្រុកបាភ្នំ ខេត្តព្រៃវែង ។ ចំណែកក្មេងស្រីរងគ្រោះ មានឈ្មោះ ភ ស ណ អាយុ១២ឆ្នាំ មុខរបរសិស្ស ស្នាក់នៅបន្ទប់ជួលជាមួយឪពុកម្តាយជាន់ទី១ខាងលើបន្ទប់ជនជាប់ចោទ មានស្រុកកំណើត ឃុំទ្រព្យ ស្រុកបាធាយ ខេត្តកំពង់ចាម ។

តាមសម្តីម្តាយក្មេងស្រីរងគ្រោះបានឲ្យដឹងថា មុនពេលកើតហេតុនៅពេលដែលជនល្មើសមកពីរត់ម៉ូតូឌុបវិញកើតជម្លោះឈ្លោះជាមួយប្រពន្ធ តែគ្មានអ្នកណាចាប់អារម្មណ៍ឡើយ ជារឿងគ្រួសាររបស់គេ រហូតដល់វេលាម៉ោង២រំលងអាធ្រាត្រ ចូលថ្ងៃទី២៥ ខែមេសា ឮសូរសម្លេង កូនស្រីស្រែក នៅលើឡៅតឿ ផ្អើលទៅមើល បែរជាឃើញជនល្មើសនៅដេកជាមួយកូនស្រីទៅវិញទើបស្រែកផ្អើលឆោឡោ ឃាត់ចាប់រហូតដល់ព្រឹកឡើងប្រគល់ឲ្យប៉ូលីសប៉ុស្តិ៍ចោមចៅតែម្តង ។

ដោយឡែកបើតាមសម្តីជនល្មើសវិញបានឲ្យដឹងថា ខ្លួនក្រោយពីផឹកស្រវឹង កាលពីល្ងាចថ្ងៃទី២៤ ចូលមកដល់ផ្ទះ កើតជម្លោះឈ្លោះប្តីប្រពន្ធមួយប្រ៉ាវ ប្រពន្ធដេញឲ្យដេកក្រៅបន្ទប់ យប់ទៅហើយអត់មានកន្លែងដេកក៏ឡើងទៅដេកបន្ទប់ឡៅតឿជាន់ទី១ ជាមួយក្មេងស្រី តែខ្លួនពុំបានធ្វើអ្វីផ្តេសផ្តាសតាមដែលការចោទប្រកាន់នោះឡើយ  រហូតដល់ឪពុកម្តាយក្មេងស្រីភ្ញាក់ចោទប្រកាន់ថាបៀតបៀនកេរ្តិ៍ខ្មាស់ក្មេងស្រីតែម្តង ។

បច្ចុប្បន្នជនសង្ស័យកំពុងធ្វើការសាកសួរនៅប៉ុស្តិ៍ចោមចៅចាត់ការទៅតាមនីតិវិធី និងកសាងសំណុំរឿងបញ្ជូនទៅផ្នែកជំនាញ អធិការដ្ឋាននគរបាលខណ្ឌពោធិ៍សែនជ័យចាត់ការបន្ត ៕

ដោយ៖ សុខាសែនជ័យ