ភ្នំពេញ ៖ ស្ត្រីម្នាក់ជាអ្នកលក់ខ្យងនិងក្ដាមប្រៃបានស្លាប់ភ្លាមៗនៅនឹងកន្លែងកើតហេតុ ខណៈជិះម៉ូតូចេញពីលក់ដូរត្រូវរថយន្តFUSOបើកបុករះម៉ូតូនិងរថយន្តពីរគ្រឿងផ្សេងទៀតពីក្រោយដែលកំពុងឈប់ភ្លើងស្តុប កាលពីវេលាម៉ោង២ និង១០នាទីរសៀល ថ្ងៃទី២៥ ខែកុម្ភៈ ឆ្នាំ២០២២ នៅចំណុចភ្លើងស្តុបផ្លូវ៥០ម៉ែត្រ កែងផ្លូវ៦០ម៉ែត្រ ក្នុងសង្កាត់ព្រែកហូរ ក្រុងតាខ្មៅ ខេត្តកណ្តាល ។
សពស្ត្រីរងគ្រោះមានឈ្មោះ វ៉ាន់ នីការ អាយុជាង៣០ឆ្នាំ មុខរបរលក់ដូរនៅផ្សារតាខ្មៅ រស់នៅស្រុកបាទី ខេត្តតាកែវ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនកេីតហេតុគឺមានរថយន្តមួយគ្រឿងម៉ាក ISUZU ពណ៌ស ពាក់ស្លាកលេខភ្នំពេញ 2AO-8139
, ម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ កណ្ដាល1AG-1067 និងរថយន្តទួរីសមួយគ្រឿងទៀត ពណ៌ស ពាក់ស្លាកលេខភ្នំពេញ 2P-0069បានបេីកមកឈប់ភ្លើងស្តុបពណ៌ក្រហមបន្តកន្ទុយគ្នានៅត្រង់ចំណុចកេីតហេតុ
។ ខណៈពេលនោះក៏មានរថយន្តបង្កម៉ាក FUSO ធុនធំ ពណ៌ក្រហម ពាក់ស្លាកលេខ ព្រះសីហនុ 3A-7070 បេីកបរដោយបុរសម្នាក់ធ្វេីដំណេីរតាមបណ្ដោយផ្លូវ៥០ម៉ែត្រក្នុងទិសដៅពីកេីតមកលិចក្នុងល្បឿនលឿន និងមិនប្រយ័ត្ន មិនមេីល
យានយន្តគេកំពុងឈប់ភ្លើងស្តុប បានបើកបុករះពីក្រោយបណ្ដាលឱ្យស្ត្រីម្នាក់ជាអ្នកលក់ខ្យងនិងក្ដាមប្រៃស្លាប់ភ្លាមៗនៅនឹងកន្លែង។ ដោយឡែករថយន្តចំនួន៣គ្រឿងទាំងរថយន្តបង្ក និងម៉ូតូមួយគ្រឿងទៀតក៏រងការខូចខាតផងដែរ។
ក្រោយកេីតហេតុភ្លាមៗ តៃកុងរថយន្តបង្កបានចុះគេចខ្លួនបាត់ស្រមោល ។ បន្ទាប់មកសមត្ថកិច្ចមូលដ្ឋានបានសហការជាមួយផ្នែកជំនាញចរាចរណ៍ក្រុងតាខ្មៅ ចុះមកធ្វេីការវាស់វែងយករថយន្តនិងម៉ូតូដែលជាវត្ថុតាងទៅរក្សាទុក រង់ចាំដោះស្រាយនាពេលក្រោយ ។ ដោយឡែកសពស្ត្រីរងគ្រោះខាងលេីត្រូវបានសមត្ថកិច្ចធ្វេីកំណត់ហេតុប្រគល់ឱ្យសាច់ញាតិក្រុមគ្រួសារដឹកយកទៅធ្វេីបុណ្យតាមប្រពៃណីនៅឯស្រុកកំណេីត ៕ ដោយ ៖ ភារ៉ា ដង្កោ
