ខេត្តកណ្ដាល៖ លោក គង់ សោភ័ណ្ឌ អភិបាលនៃគណៈអភិបាលខេត្តកណ្ដាល នៅព្រឹកថ្ងៃចន្ទ ៥កើត ខែផល្គុន ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៧ ខែមីនា ឆ្នាំ២០២២នេះ បានដឹកនាំកិច្ចប្រជុំពិនិត្យពិភាក្សា លើការផ្តល់សេវាប្រមូលសំរាម ក្នុងភូមិសាស្ត្រក្រុងតាខ្មៅ ជាមួយក្រុមហ៊ុនស៊ិនទ្រី។
នាឱកាសនោះ លោក គង់ សោភ័ណ្ឌ បានថ្លែងថា៖ ក្នុងកិច្ចប្រជុំពិនិត្យពិភាក្សា និងផ្តល់គោលការណ៍ណែនាំ លើការផ្តល់សេវាប្រមូលសំរាមក្នុងភូមិសាស្រ្តក្រុងតាខ្មៅ ជាមួយក្រុមហ៊ុនស៊ិនទ្រី និងរដ្ឋបាលក្រុងតាខ្មៅក្នុងគោលបំណង ជម្រុញពង្រឹងការងារប្រមូលសំរាមឲ្យបានស្អាត ទៀងទាត់ពេលវេលា នៅទូទាំងក្រុងតាខ្មៅ ការរៀបចំរណ្តៅសំរាមថ្មីដើម្បីឲ្យក្រុងតាខ្មៅ កាន់តែមានសោភ័ណភាពល្អ ស័ក្តិសមជាទីក្រុងស្អាត ទីក្រុងទេសចរណ៍ នៃខេត្តកណ្តាល។
ជាមួយគ្នានេះដែរ លោកអភិបាលខេត្ត ក៏សូមអំពាវនាវដល់បងប្អូនប្រជាពលរដ្ឋទាំងអស់សូមចូលរួមទុកដាក់សំរាមឱ្យបានត្រឹមត្រូវ តាមពេលវេលាកំណត់ កុំបោះចោលសំរាមតាមផ្លូវ និងប្រភពទឹក និងសូមចូលរួមបង់ថ្លៃសេវាប្រមូលសំរាមឲ្យបានទៀងទាត់៕ដោយ៖សហការី
