ខេត្តកោះកុង៖ កម្លាំងនគរបាលប៉ុស្តិ៍ និងក្រុងខេមរភូមិន្ទ បានឃាត់ខ្លួនបុរសម្នាក់ដែលប្រើអំពើហិង្សាវាយតប់ប្រពន្ធ រហូតដល់ស្លាប់នៅនឹងកន្លែង ហើយបច្ចុប្បន្នជនសង្ស័យត្រូវបានបញ្ជូនទៅស្នងការដ្ឋាននគរបាលខេត្តដើម្បីអនុវត្តនីតិវីធីបន្ត។
លោក យស់ ចាន់វិចិត្រ អធិការនគរបាលក្រុងខេមរភូមិន្ទបានឱ្យដឹងនៅព្រឹកថ្ងៃទី៧ ខែមីនា ឆ្នាំ២០២២នេះថា ជនសង្ស័យជាប្តីឈ្មោះ ឈឿន ស៊ុងកាន អាយុ ៤៥ឆ្នាំ មុខរបរជាអ្នកនេសាទ រស់នៅភូមិស្ទឹងវែង សង្កាត់ស្ទឹងវែង។
លោកបានបន្តថា មូលហេតុដែលធ្វើឱ្យបុរសជាប្តីប្រើអំពើហិង្សាដោយដៃជើង វាយធាក់ទៅលើស្ត្រីជាប្រពន្ធបណ្តាលឱ្យស្លាប់ភ្លាមៗនោះ គឺកើតចេញពីការស្រវឹងស្រា និងភ្លើងប្រចណ្ឌ។
បើតាមលោកអធិការនគរបាលក្រុងខេមរភូមិន្ទបានបញ្ជាក់ថា ករណីប្តីប្រើហិង្សាលើប្រពន្ធឈ្មោះ សូ សុភ័ស្ត អាយុ ៣៧ឆ្នាំនេះគឺកើតឡើងកាលពីថ្ងៃទី៦ ខែមីនា វេលាម៉ោង១និង៣៧នាទីរំលងអធ្រាត្រ ។
ចំណែកសមត្ថកិច្ចជំនាញវិញបានបញ្ជាក់ថា បុរសជាប្តីធ្លាប់យកបងស្រីរបស់ស្ត្រីជនរងគ្រោះធ្វើជាប្រពន្ធ ហើយក្រោយពីបងស្រីរបស់ប្រពន្ធស្លាប់ដោយសារតែផឹកស្រាច្រើនមកជនសង្ស័យក៏បន្តយកស្ត្រីរងគ្រោះ (សុភ័ស្ត) ធ្វើជាប្រពន្ធ ហើយនាងក៏ផឹកស្រាច្រើនដូចបងស្រីនាងដែរ។
បច្ចុប្បន្ន បុរសជាជនសង្ស័យត្រូវបាន
សមត្ថកិច្ចបញ្ជូនខ្លួន និងសំណុំរឿង ទៅកាន់ស្នងការដ្ឋាននគរបាល ខេត្តកោះកុង ដើម្បីបន្តអនុវត្តនីតិវិធីច្បាប់៕ ដោយអរុណរះ
