ខេត្តស្វាយរៀង៖ យ៉ាងហោចណាស់ មានមនុស្សចំនួន៤នាក់ បានរងរបួសធ្ងន់ នៅក្នុងករណីគ្រោះថ្នាក់ចរាចរណ៍ ដ៏គួរឲ្យរន្ធត់មួយរវាងរថយន្តដឹកកុងតឺន័រ បុកជាមួយ រថយន្តហ៊ីយ៉ាន់ដាយ ដឹកឡាំងក្រដាស ក្នុងទិសដៅផ្ទុយគ្នា
បណ្តាលឱ្យរថយន្តដឹកឡាំងក្រដាស ខ្ទាតប៉ើងថយក្រោយ ក្រឡាប់សង្កត់ពីលើម៉ូតូ អ្នកដំណើរកំពុងធ្វើដំណើរពីខាងក្រោយ នៅលើចំណុចផ្លូវជាតិលេខ១ នៅវេលាម៉ោង២និង៤៤នាទីរសៀលថ្ងៃទី១០ ខែមីនា ឆ្នាំ២០២២ស្ថិតនៅ
ភូមិថ្នល់កែង ឃុំកណ្ដៀងរាយ ស្រុកស្វាយទាប ខេត្តស្វាយរៀង។

បើតាមសមត្ថកិច្ចជំនាញនគរបាលស្រុកស្វាយទាប បានឲ្យដឹងថា
មានរថយន្តធំបង្ក ម៉ាក Hyundai ពណ៌ស ពាក់ស្លាកលេខ ភ្នំពេញ៣F ៨៦០៩ ទិសដៅពីកើតទៅលិច បើកបរដោយឈ្មោះ ទុន នីម៉ៃ ភេទប្រុស អាយុ ៣៨ឆ្នាំ មុខរបរបើកបរ ភូមិសំឡឆៅ ឃុំចន្រ្តី ស្រុករមាសហែក ខេត្តស្វាយរៀង រងរបួសធ្ងន់  រថយន្តខូចខាតធ្ងន់ មកដល់ចំណុចកើតហេតុខាងលើ បានវ៉ារថយន្តនៅពីមុខហើយក៏ជ្រុលទៅបុកថយន្តកុងតឺន័រ ម៉ាកHYUNDAI ពណ៌សពាក់ស្លាកលេខ ភ្នំពេញ៣E  ២៦៥៥ ក្នុងទិសដៅផ្ទុយគ្នាពីលិចទៅកើត បើកបរដោយឈ្មោះហម រ៉េន ភេទប្រុស  អាយុ៣១ឆ្នាំ មុខរបរ បើកបររស់នៅភូមិត្រពាំងមូល ឃុំជើងគោក ក្រុងព្រះសីហនុ ខេត្តព្រះសីហនុ ។

ប្រភពបន្តថា បន្ទាប់មករថយន្តបង្កបានខ្ទាតទៅប៉ះម៉ូតូពីរគ្រឿងទៀត  ម៉ាកហុងដាសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ស្វាយរៀង ១J ៣៩៨៧ ទិសដៅពីកើតទៅលិច បើកបរដោយឈ្មោះ តូច សីហា ភេទប្រុស អាយុ ២៣ឆ្នាំ មុខរបរ លក់ឆ្នោត រស់នៅភូមិតាម៉ ឃុំតាសួស ស្រុកស្វាយជ្រំ ខេត្តស្វាយរៀង ។
និងម៉ូតូទីពីរ ម៉ាកហុងដាសេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ ស្វាយរៀង ១F ០៨៦១ ទិសដៅពីកើតទៅលិច បើកបរដោយឈ្មោះ ថាយ ភក្តី  ភេទប្រុស អាយុ ២៩ឆ្នាំ មុខរបរបុគ្គលិកមន្រ្តីមហានគរ រស់នៅភូមិវាលយន្ត សង្កាត់ស្វាយរៀង ក្រុងស្វាយរៀង ខេត្តស្វាយរៀង។

ប្រភពបន្តថា ករណីនេះអ្នករងរបួសធ្ងន់ទាំងបួននាក់យកទៅសំរាកព្យាបាលនៅមន្ទីរពេទ្យបង្អែកស្វាយទាប ចំពោះមធ្យោយបាយទាំងអស់យកមករក្សាទុកនៅការិយាល័យចរាចរណ៍ផ្លូវគោកខេត្តស្វាយរៀង ។

សមត្ថកិច្ចបញ្ជាក់មូលហេតុដោយសារតែអ្នកបេីកបររថយន្តធំម៉ាក HYUNDAI ផ្លាកលេខ ភ្នំពេញ ៣F ៨៦០៨ វ៉ាជែងក្នុងស្ថានភាពគ្រោះថ្នាក់ ៕

ដោយ៖ យឹម សុថាន