ខេត្តកំពង់ធំ៖ មានការភ្ញាក់ផ្អើលមួយបណ្ដាលឲ្យស្រ្ដីវ័យចំណាស់ម្នាក់បានស្លាប់អណ្ដែតទឹកក្រោមស្ពានស្ទឹងសែនខេត្តកំពង់ធំកាលពីព្រឹកថ្ងៃទី២៥ ខែមេសា ឆ្នាំ២០១៦ ដោយការសន្និដ្ឋានជំហានដំបូងរបស់សមត្ថកិច្ចថាប្រហែលជារំលោភហើយវាយសម្លាប់រួចអូសទំលាក់ទឹកស្ទឹងសែនតែម្ដង។
ក្រោយពីសមត្ថកិច្ចបានស៊ើបអង្កេតរកមុខសញ្ញារួចមក លោក ញែម ឈុនលី អធិការក្រុងស្ទឹងសែន បានប្រាប់ឲ្យដឹងថា ដើមហេតុស្រ្ដីរងគ្រោះជាជនអនាថាដើរសុំទានតាមផ្សារម្នាក់ មានជំងឺវិកលចរិកបានផឹកស៊ីស្រវឹងក៏បានដើរទៅក្បែរស្ពាន់ស្ទឹងសែន ស្រែកឡូឡា ធ្វើឲ្យថ្លង់ដល់ជនល្មើសញៀនថ្នាំ៣នាក់ ខឹងក៏ចាប់វាយដល់រហូត ស្លាប់រួចអូសទម្លាក់ទឹកតែម្ដង ពុំមានការចាប់រំលោភនោះទេ។
ជនរងគ្រោះឈ្មោះ ឈាន ហ៊ុច ភេទស្រី អាយុ៤៩ឆ្នាំរស់នៅភូមិថ្នល់ ឃុំទួលក្រើល ស្រុកប្រាសាទបល្ល័ង្គ ខេត្តកំពង់ធំ សាកសពបានបញ្ជូនទៅតំកល់ទុកនៅមន្ទីរពេទ្យបង្អែកខេត្តកំពង់ធំ ដើម្បីធ្វើកោសល្យវិច្ច័យ និងរងចាំសមត្ថកិច្ចមូលដ្ឋានព្រមទាំងក្រុមគ្រួសារសពមកទទួលយកទៅធ្វើបុណ្យ ។ ចំណែកជនល្មើសទាំង៣នាក់ត្រូវបានសមត្ថកិច្ចនៃអធិការក្រុងស្ទឹងសែនចាប់បានហើយ ដោយលោក ញែម ឈុនលី អធិការក្រុងបានប្រាប់ថាកំពុងតែសាកសួរចំលើយ ទី១ឈ្មោះ ហេង ធារ៉ា ភេទប្រុស អាយុ១៦ឆ្នាំ ទី២ឈ្មោះ យ៉ានចំណាប់ ភេទប្រុស អាយុ១៩ឆ្នាំ និងទី៣ឈ្មោះ សុខ សីហា ភេទប្រុស អាយុ២៥ឆ្នាំ កំពុងបន្ដសួយចំលើយមិនទាន់បញ្ចូនទៅតុលាការទេ ដោយជនល្មើសឈ្មោះហេង ធារ៉ា បានឆ្លើយសារភាពថាខ្លួនពិតជាបានធ្វើសកម្មភាពសម្លាប់ពិតមែនហើយឈ្មោះ យ៉ានចំណាប់ និងសុខសីហា ជាអ្នកចូលរួមអូសសាកសពទម្លាក់ទឹក ។
រហូតមកដល់ថ្ងៃរសៀលទី២៥ខែមេសាឆ្នាំ២០១៦ សមត្ថកិច្ចបានបញ្ចូនជនល្មើសទាំង៣នាក់ទៅសាលាដំបូងខេត្តកំពង់ធំ ហើយតុលាការក៏បានបញ្ចូនទៅពន្ធនាគារខេត្តកំពង់ធំនៅវេលាម៉ោង២និង៤៨នាទីបន្ដ៕
ដោយ៖ ប៊ុន រិទ្ធី
