ក្រុងប៉ោយប៉ែត៖ មានក្រុមអ្នករត់តាក់ស៊ីប្រភេទឡានតូចៗជាច្រើននាក់ បាននាំគ្នាចតរថយន្តដ៏ប្រសេចប្រសាចលើកំណាត់ផ្លូវជាតិលេខ៥០ ចំណុចកូនដំរី ដែលមានចម្ងាយប្រមាណជាង១១គីឡូម៉ែត្រពីក្រុងប៉ោយប៉ែត ក្នុងគោលបំណងតវ៉ាជាមួយនិងសមត្ថកិច្ចគយចល័តដាក់ប៉ុស្តិ៍នៅទីនោះកាលពីវេលាម៉ោង៩និង២៥នាទីព្រឹកថ្ងៃទី២៦ ខែមេសា ឆ្នាំ២០១៦ ។
សមត្ថកិច្ចគយបានចាត់ទុកថា ក្រុមអ្នករត់តាក់ស៊ីបានលួចបង្កប់នូវទំនិញគេចពន្ធជាច្រើនប្រភេទ ដូច្នេះប្រឈមនិងការទប់ស្កាត់ បញ្ចៀសការខាតបង់ចំណូលពន្ធនាំចូល។ ដោយឡែកក្រុមអ្នករត់តាក់ស៊ីលើកឡើងថា សមត្ថកិច្ចគយជាន់កពួកគាត់ គ្មានមនោសញ្ចេតនាយោគយល់ ចាប់ទំនិញនិងតម្រូវឲ្យបង់ប្រាក់។
សកម្មភាពប្រទាញប្រទង់គ្នាព្រឹកមិញបង្កឲ្យមានការភ្ញាក់ផ្អើលពីមហាជននិងស្ទះចរាចរណ៍មួយរយៈខ្លីផងដែរ ក្នុងនោះក៏មានសមត្ថកិច្ច អាជ្ញាធរចុះអន្តរាគមន៍។
គួររំលឹកថា កន្លងទៅក្រុមសមត្ថកិច្ចគយក្រុងប៉ោយប៉ែតក៏ដូចជាគយចល័តរបស់សាខាគយនិងរដ្ឋករខេត្តបន្ទាយមានជ័យដាក់កុងត្រូលជាច្រើនកន្លែង ចាំប្រមូលលុយពីក្រុមឈ្មួញដឹងតាមរថយន្តឆ្លងកាត់។ ករណីខ្លះទៀតគឺតម្រូវឲ្យមានការបង់ខែផងដែរ សុទ្ធតែជាអំពើពុករលួយ។
ដោយឡែកក្រុមអ្នករត់តាក់ស៊ីមួយចំនួនក៏មានលក្ខណៈខុសឆ្គងច្រើនដែរ ត្រង់លួចបង្កប់ដឹកទំនិញគេចពន្ធបើជារឿងម្ដងម្កាលនោះមិនអីទេ ករណីដោះស្រាយក្រពះ ប៉ុន្តែអ្នករត់តាក់ស៊ីខ្លះគាត់ចាត់ទុកទំនិញរត់ពន្ធជាមុខរបរទទួលនូវផលប្រយោជន៍ជាប្រចាំ ។ មិនតែប៉ុណ្ណោះក៏មានអ្នករត់តាក់ស៊ីខ្លះ យកបណ្ណរបស់ក្រសួងព័ត៌មានទៅដាក់ក្នុងរថយន្ត កាន់បណ្ណព័ត៌មានក្នុងគោលបំណង បង្ហាញនិងបញ្ជាក់ពីឥទ្ធិពលអំណាចទៅលើសមត្ថកិច្ចអាជ្ញាធរពាក់ព័ន្ធ ខុសនិងវិជ្ជាជីវៈ ជាពិសេសការចេញបណ្ណព័ត៌មាននេះភាគច្រើនមកពីអង្គភាពដែលពុំសូវមានការចេញផ្សាយត្រឹមត្រូវ ឬមិនមែនជាអាជីពសារព័ត៌មានផ្នែកបោះពុម្ពចែកចាយ វិនិយោគប្រណាំងប្រជែងលើទីផ្សារ។ ក្រសួងព័ត៌មានគួរចាត់ការក្នុងភាពមិនប្រក្រតីនេះផងដែរ។
ពាក់ព័ន្ធករណីនេះ នគរដ្រេហ្គន មិនអាចទាក់ទងបានទេពីលោក ឆែ សុធា ប្រធានសាខាគយនិងរដ្ឋករខេត្តបន្ទាយមានជ័យដោយទូរសព្ទចូលគ្មានអ្នកទទួលកាលពីព្រឹកថ្ងៃទី២៦ ខែមេសា ឆ្នាំ២០១៦៕
ដោយ៖ វណ្ណា
