ខេត្តសៀមរាប៖ យោងតាមប្រភពព័ត៌មានពីមន្ត្រីនគរបាលខេត្តសៀមរាប បានឱ្យដឹងនៅព្រឹកថ្ងៃអង្គារទី១៥ ខែមីនា ឆ្នាំ២០២២នេះថា៖ កម្លាំងនគរបាលស្រុកសូទ្រនិគម បានស្រាវជ្រាវឃាត់ខ្លួនយុវជន ២នាក់ដែលប្រេីកាំបិតជិះម៉ូតូដេញកាប់យុវជនរងគ្រោះចំនួន ២នាក់ បណ្ដាលឱ្យរបួសធ្ងន់ រួចក៏ជិះម៉ូតូគេចខ្លួនបាត់ស្រមោល។ បន្ទាប់ពីឃាត់ខ្លួនពួកគេសាកសួរបញ្ចប់នីតិវិធី និងត្រៀមបញ្ជូនខ្លួនទៅកាន់សាលាដំបូងខេត្ត ដើម្បីចាត់ការតាមច្បាប់។
ប្រភពដដែលបន្តថា ជនសង្ស័យទាំងពីរនាក់នេះ ទី១,ឈ្មោះ វុទ្ធី សំណាង ហៅចំបើង ភេទប្រុស អាយុ២០ឆ្នាំ ទីលំនៅក្នុងភូមិបិទមាស ឃុំសំរោង ស្រុកសូទ្រនិគម និងទី២,ឈ្មោះ ព្រំ បាយ័ន ភេទប្រុស អាយុ២៣ឆ្នាំ មុខរបរដឹកអុសលក់ ទីលំនៅក្នុងភូមិតាយ៉ែក ឃុំតាយ៉ែក ស្រុកសូទ្រនិគម។ ចំណែកជនរងគ្រោះដែលរងរបួសធ្ងន់ទាំង២នាក់ ទី១,ឈ្មោះ វ៉ាត់ វៀត ភេទប្រុស អាយុ១៨ឆ្នាំ និងទី២;ឈ្មោះ វ៉ាត់ នាថ ភេទប្រុស អាយុ១៧ឆ្នាំ រស់នៅភូមិទ័ពជ័យ ឃុំបឹងមាលា ស្រុកស្វាយលើ ។
យោងតាមដំណើររឿង បានឱ្យដឹងថា ហេតុការណ៍ខាងលេីនេះ បានកេីតឡេីងកាលពីយប់ថ្ងៃទី១១ ខែមីនា ឆ្នាំ២០២២កន្លងទៅ វេលាម៉ោងប្រមាណ៩យប់ មានករណីប្រើហិង្សាដើម្បីដោះស្រាយគំនុំចាស់ ខណៈជួបគូបដិបក្ខកំពុងជិះម៉ូតូត្រឡប់ទៅផ្ទះវិញ នៅចំណុចជប់ស្មាច់ ភូមិត្រាវបាក់ ឃុំតាយ៉ែក ស្រុកសូទ្រនិគម។ ខណៈជនបង្ក បានធ្វេីសកម្មភាពជិះម៉ូតូដេញកាប់ប្រហារទៅលេីយុវជនពីរនាក់ បណ្ដាលឱ្យរបួសធ្ងន់ព្រោះតែរឿងសងសឹកគ្នាកាលពីមួយឆ្នាំមុន។ ក្រោយកេីតហេតុ ជនដៃដល់ក៏បានជិះម៉ូតូគេចខ្លួនបាត់ទៅ តែត្រូវកម្លាំងនគរបាលស្រុកសូទ្រនិគម ធ្វើការស្រាវជ្រាវរហូតឃាត់ខ្លួនបានទាំង២នាក់ កាលពីរសៀលថ្ងៃទី១៣ ខែមីនា ឆ្នាំ២០២២ នៅភូមិត្រាវបាក់ ឃុំតាយ៉ែក ស្រុកសូទ្រនិគម រួចនាំយកទៅសាកសួរនៅការិយាល័យជំនាញ។
ប្រភពព័ត៌មាន បានឱ្យដឹងទៀតថា នៅយប់ថ្ងៃទី១១ ខែមីនា ឆ្នាំ២០២២ វេលាម៉ោងប្រហែល៩ ក្រុមជនរងគ្រោះមានគ្នា៦នាក់ ជិះម៉ូតូចំនួន៤គ្រឿង បានចេញពីភូមិទៅលេងលោតប៉ុង (លោតលើសំណាញ់) និងគប់ប៉េងប៉ោង នៅសាលាបឋមសិក្សាជប់ស្មាច់ ស្ថិតក្នុងភូមិត្រាវបាក់ ឃុំតាយ៉ែក។ ពួកគេនាំគ្នាលេងកម្សាន្តរហូតដល់ម៉ោង៩យប់ ទើបនាំគ្នាជិះម៉ូតូត្រឡប់ទៅផ្ទះវិញ ។ ខណៈកំពុងធ្វើដំណើរតាមផ្លូវដល់ចំណុចជប់ស្មាច់ ភូមិត្រាវបាក់ ឃុំតាយែក ស្រាប់តែមានម៉ូតូ១គ្រឿង ជិះគ្នា២នាក់ ក្នុងទិសដៅបញ្ច្រាសទិសគ្នា ពេលជិះហួសបន្តិចក៏បត់មកតាមម៉ូតូពួកខ្លួន ហើយយកកាំបិតកាប់ពួកខ្លួន បណ្ដាលឱ្យដួលម៉ូតូ និងរងរបួសធ្ងន់ វ៉ាត់ វៀត រយះខ្នង និងឈ្មោះ វ៉ាត់ នាថ រយះត្រគាក។
ក្រោយឃាត់ខ្លួននៅចំពោះមុខសមត្ថកិច្ច ជនដៃដល់ទាំង ២នាក់សារភាពថា៖ ពួកគេពិតជាបានធ្វេីសកម្មភាពកាប់ជនរងគ្រោះទាំង២នាក់ខាងលើពិតប្រាកដមែន ដោយឈ្មោះ ព្រំ បាយ័ន ជាអ្នកកាប់ផ្ទាល់ ហើយឈ្មោះ វុទ្ធី សំណាង ជាអ្នកបើកម៉ូតូ។ ដោយឡែកមូលហេតុដែលពួកគេកាប់ជនរងគ្រោះ ព្រោះតែក្រុមជនរងគ្រោះធ្លាប់ដេញវាយពួកខ្លួនកាលពីឆ្នាំមុន។
បច្ចុប្បន្នជនសង្ស័យទាំងពីរនាក់នេះ រួមនិងវត្ថុតាងកាំបិតខ្វែវ១ដេីម ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូង ដើម្បីចាត់ការទៅតាមនីតិវិធីច្បាប់៕
ដោយ៖សហការី
