ភ្នំពេញ៖ បន្ទាប់ពីមានសេចក្តីរាយការណ៍របស់ប្រជាពលរដ្ឋថា៖ ទីតាំងតារាងបាល់ទះមួយកន្លែង ស្ថិតនៅផ្ទះលេខ៧៦ ផ្លូវ៤៦៦ ក្នុងសង្កាត់បឹងត្របែក ខណ្ឌចំការមន មានការលេងល្បែងស៊ីសងខុសច្បាប់។ ភ្លាមៗកម្លាំងនៃគណៈបញ្ជាការឯកភាព ខណ្ឌចំការមន ដឹកនាំដោយលោក យស យុទ្ឋី អភិបាលរងខណ្ឌ នារសៀលថ្ងៃទី១៧ ខែមីនា ឆ្នាំ២០២២ បានចុះពិនិត្យមើល ទីតាំងតារាងបាល់ទះមួយនេះ ដោយពុំរកឃើញថាមានការលេងល្បែងស៊ីសងណាមួយ គួរកត់សម្គាល់នោះទេ។ ប៉ុន្តែជាក់ស្ដែង នៅទីតាំងនេះគឺមានតែការលេងបាល់ទះធម្មតាប៉ុណ្ណោះ។
ក្នុងប្រតិបត្តិការនោះ លោក យស យុទ្ឋី អភិបាលរងខណ្ឌ បានបញ្ជាក់ថា៖ ក្រោយត្រួតពិនិត្យរួច គឺថាពុំមានសកម្មភាពបើកលេងល្បែងស៊ីសង ដូចសេចក្ដីរាយការណ៍របស់ប្រជាពលរដ្ឋនោះទេ។ ប៉ុន្តែអាជ្ញាធរ បានសម្រេចផ្អាកមិនឱ្យមានការលេងបាល់ទះ ជាធម្មតានេះជាបណ្តោះអាសន្នសិន។
ដោយឡែក នៅចំពោះមុខអាជ្ញាធរ ម្ចាស់ទីតាំង ឈ្មោះ កែវ ពិសី ក៏បានយល់ព្រមផ្អាកអាជីវកម្មតារាងបាល់ទះ ជាបណ្តោះអាសន្នផងដែរ៕
ដោយ៖សហការី
