ប្រជាពលរដ្ឋទៅបង់សំណាញ់ប្រទះឃើញកាំភ្លើងAkមួយដើមត្រាំក្នុងទឹកយកទៅប្រគល់ឱ្យសមត្ថកិច្ច

ចែករំលែក៖

ខេត្តបន្ទាយមានជ័យ ៖ ប្រជាពលរដ្ឋ២នាក់ខណៈទៅបង់សំណាញ់យកត្រីស្រាប់តែបានប្រទះឃើញកាំភ្លើងវែង១ដើមម៉ាក AK 47 បង់០១ និងគ្រាប់០៨គ្រាប់ដែលមានច្រែះចាប់ទៅហើយត្រាំក្នុងទឹកមិនដឹងតាំងពីពេលណា។ ក្រោយរកឃើញកាំភ្លើងចាស់មួយដើមនេះប្រជាពលរដ្ឋរូបនេះ បានយកទៅប្រគល់ជូននគរបាលប៉ុស្តិ៍រដ្ឋបាលទួលពង្ររក្សាទុក។
សមត្ថកិច្ចនគរបាលប៉ុស្តិ៍រដ្ឋបាលទួលពង្របានទទួលកាំភ្លើងវែងមួយដើមនេះពីប្រជាពលរដ្ឋនៅវេលាម៉ោង១០និង៤៧នាទីព្រឹក ថ្ងៃទី១៩ ខែមីនា ឆ្នាំ២០២២ នៅស្នាក់ការប៉ុស្តិ៍រដ្ឋបាល។
លោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានឲ្យដឹងថា តាមសេចក្តីរាយការណ៍ពីលោកមេភូមិរស្មីសាមគ្គី ឃុំទួលពង្រ នៅវេលាម៉ោង ១០និង៣៥ នាទីនៅថ្ងៃទី១៨ ខែមីនា ឆ្នាំ ២០២២ មានប្រជាពលរដ្ឋ០២នាក់ឈ្មោះ ១-/សុំ លាន ភេទប្រុស អាយុ ៤៤ឆ្នាំ, ២-/ម៉ិញ ឈិន ប្រុស អាយុ ៥៧ឆ្នាំ រស់នៅភូមិរស្មីមានជ័យ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ បានទៅរកត្រីនៅចំណុចអូរជាប់ព្រំប្រទល់ស្រុកអូរជ្រៅនិងស្រុកម៉ាឡៃ ។ នៅពេលពួកគាត់បង់សំណាញ់រួរួចចុះទៅចាប់ត្រីក្នុងទឹកស្រាប់តែប៉ះនឹងកាំភ្លើងវែង១ដើមធុន AK ក្នុងសំណាញ់ ក៏បានរាយការណ៍មកមលោក។ បន្ទាប់មកលោកបានឲ្យប្រជាពលរដ្ឋទាំង០២នាក់នោះយកកាំភ្លើង១ដើមនេះមកប្រគល់ឲ្យនគរបាលបុកទួលពង្ររក្សាទុក ។
លោកអធិការបានបន្ថែមថា តាមកម្លាំងនគរបាលប៉ុស្តិ៍ប្រាប់ថា កាំភ្លើងវែង ធុនAK 47 ១ដើមនេះជាប្រភេទកាំភ្លើងកំបុតស្វាយ មានបង់០១ និងគ្រាប់ ចំនួន០៨ គ្រាប់ មានគុណភាពប្រហែល២០% ដែលបន្សល់ទុកពីសម័យសង្គ្រាម ៕