ខេត្តពោធិ៍សាត់៖ លោកអធិការនគរបាលស្រុកបាកាននិងមន្រ្តីនគរបាលជាច្រើនរូបព្រមទាំងមន្រ្តីពាក់ព័ន្ធនានា នាំយកទឹកចែកជួនប្រជាពលរដ្ឋចំនួន៣ភូមិ ដែលកំពុងជួបការខ្វះខាតទឹកប្រើប្រាស់ នៅគ្រាដែលអាកាសធាតុឡើងកម្ដៅខ្លាំង។
សកម្មភាពផ្តល់ទឹកដល់ពលរដ្ឋនេះបានធ្វើឡើងនៅព្រឹកថ្ងៃទី២៧ ខែមេសា ឆ្នាំ២០១៦ នៅភូមិចំនួន៣ គឺភូមិចំបក់មាស, ភូមិទួលខ្មែរ និងភូមិត្រាំពែរ ឃុំស្នាមព្រះ ស្រុកបាកាន ខេត្តពោធិ៍សាត់។
លោកវរសេនីយ៍ត្រី នាង វុធ អធិការនគរបាលស្រុកបាកានបានឲ្យដឹងថា តាមការបញ្ជាពីអភិបាលខេត្តនិងកិច្ចចង្អុលការពីឧត្តមសេនីយ៍ទោស្នងការ នៅព្រឹកថ្ងៃទី២៧ ខែមេសា ឆ្នាំ២០១៦ លោកនិងមន្ត្រីរាជការជាច្រើនរូបបាននាំយកទឹកចំនួន៣រថយន្តទៅចែកជូនប្រជាពលរដ្ឋចំនួន៣ភូមិ ខណៈប្រជាជនទាំងនោះជួបការខ្វះខាតទឹកប្រើប្រាស់ប្រាស់ពេលធាតុអាកាសកំពុងឡើងកម្ដៅ។
លោកអធិការបន្តថា ទឹកទាំង៣រថយន្តយកទៅចែកជូនពលរដ្ឋនេះ ២រថយន្តរបស់ស្នងការនគរបាល និង១រថយន្តទៀតរបស់សាខាកាកក្របាទក្រហមខេត្ត ដែលទឹកទាំង៣រថយន្តសរុបចំនួន ១៤,០០០លីត្រ យកទៅចែកជូនប្រជាជនចំនួន៣ភូមិ ស្មើរនឹងប្រជាជនចំនួន១៨៦ គ្រួសារបានមកទទួលយកទឹក។ លោកអធិការបន្តទៀតថា កិច្ចការនេះកម្លាំងយើងនឹងនៅអនុវត្តធ្វើជាបន្តបន្ទាប់ទៀតតាមតំរ៉ូវការរបស់ប្រជាពលរដ្ឋ ៕
ដោយ៖ ប៉ឹម ពិន
