ភ្នំពេញ ៖ បុរសជនជាតិបរទេសម្នាក់ជិះម៉ូតូ ខ្វះការប្រុងប្រយ័ត្នរេចង្កូតបុករថយន្តALPHARDមួយគ្រឿងបណ្ដាលឲ្យរងរបួសធ្ងន់ ចំណែកឯរថយន្តរងការខូចខាតអស់មួយចំហៀងយ៉ាងដំណំ។

ហេតុការណ៍គ្រោះថ្នាក់ចរាចរណ៍នេះបង្ករការភ្ញាក់ផ្អើលកាលពីវេលាម៉ោង១១ និង៥០ នាទីព្រឹក ថ្ងៃទី០៣ ខែមេសា ឆ្នាំ២០២២ ដែលស្ថិតនៅត្រង់ចំណុចច្រកចូលព្រលានយន្តហោះអន្តរជាតិភ្នំពេញពោធិ៍ចិនតុង តាមបណ្ដោយមហាវិថីសហព័ន្ធរុស្ស៊ី ក្នុងសង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុគេបានឃើញរថយន្ត មួយគ្រឿងម៉ាកALPHARDពណ៌ខ្មៅពាក់ស្លាកលេខភ្នំពេញ 2BF1199បើកបរដោយបុរសម្នាក់ធ្វើដំណើរក្នុងទិសដៅពីលិចមកកើត លុះមកដល់ចំណុចកើតហេតុស្រាប់តែមានម៉ូតូមួយគ្រឿងម៉ាកAIR BLADEពណ៌ស្កពាក់ស្លាកលេខភ្នំពេញ 1N 9088បើកបរដោយបុរសជនជាតិបរទេសម្នាក់ធ្វើដំណើរបញ្ជ្រាស់ទិសគ្នាក្នុងទិសដៅពីកើតទៅលិចស្រាប់តែរេចង្កូតទៅបុករថយន្តALPHARDចំផ្នែកចំហៀងខាងឆ្វេងពេញទំហឹងបណ្ដាលឲ្យដួលរងរបួសត្រូវបានបញ្ជូនទៅកាន់មន្ទីរពេទ្យភ្លាមៗ ចំណែកឯរថយន្តនិងម៉ូតូរងការខូចខាតយ៉ាងដំណំ។

ក្រោយកើតហេតុសមត្ថកិច្ចមូលដ្ឋានបានមកដល់រួចបានយករថយន្តនិងម៉ូតូទៅអធិការដ្ឋាននគរបាល ខណ្ឌពោធិ៍សែនជ័យរង់ចាំធ្វើការដោះស្រាយគ្នានៅពេលក្រោយតាមផ្លូវច្បាប់៕

ដោយ៖ និន សុភ័ស្ត