ខេត្តព្រះសីហនុ៖ លោក គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុ នៅព្រឹកថ្ងៃច័ន្ទ ១០កើត ខែចេត្រ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១១ ខែមេសា ឆ្នាំ២០២២ បានដឹកនាំកិច្ចប្រជុំគណៈកម្មាធិការសាខា ស្ដីពីការរៀបចំប្រារព្ធខួបលើកទី១៥៩ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ដោយមានការអញ្ជើញចូលរួមពីលោក លោកស្រីជាគណៈកម្មាធិកាសាខាក្រុង ស្រុក។
លោក គួច ចំរើន ប្រធានគណៈកម្មាធិការសាខាកាកបាទក្រហមកម្ពុជាខេត្តព្រះសីហនុមានប្រសាសន៍បើកកិច្ចប្រជុំ ស្តីពីការរៀបចំប្រារព្ធខួបទី១៥៩ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា និងការប្រារព្ធព្រះរាជពិធីបុណ្យចម្រើនព្រះជន្មហ្លួងម៉ែ នៅថ្ងៃទី១៨ ខែមិថុនា ឆ្នាំ២០២២ ព្រមទាំងបានថ្លែងអំណរគុណលោក លោកស្រីជាគណៈកម្មាធិកាសាខាក្រុង ស្រុកទាំង៥ និងមន្ត្រីសាខាកាកបាទក្រហមដែលបានលះបង់កម្លាំងកាយចិត្តក្នុងការចូលរួមយុទ្ធនាការប្រយុទ្ធប្រឆាំងនិងជំងឺកូវីដ-ពិសេសក្នុងការចុះចែកស្បៀងក្នុងតំបន់បិទខ្ទប់ និងការចែកអំណោយជូនប្រជាពលរដ្ឋងាយរងគ្រោះ និងប្រជាពលរដ្ឋរងគ្រោះដោយគ្រោះធម្មជាតិ (ខ្យល់កន្ត្រាក់)ជាដើម។
លោកប្រធាន បញ្ជាក់ថា ការប្រារព្ធខួបលើកទី១៥៩ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ក្រោមប្រធានបទ “ទាំងអស់គ្នា រួមជាមួយកាកបាទក្រហមកម្ពុជាដោះស្រាយបញ្ហាប្រឈមនានា និងបន្តភាពធន់សហគមន៍” ដើម្បីឆ្លើយតបទៅនឹងសេចក្តីត្រូវការ នៃភាពងាយរងគ្រោះនៅក្នុងខេត្តឱ្យបានសកិ្តសម ជាជំនួយការអាជ្ញាធរសាធារណៈក្នុងវិស័យមនុស្សធម៌។ ទន្ទឹមនឹងនោះ ការអំពាវនាវដល់សប្បុរសជនគ្រប់មជ្ឈដ្ឋានចូលរួមបរិច្ចាគថវិកាតាមសទ្ធាជ្រះថ្លា និងដោយស្ម័គ្រចិត្តជូនសមាគមជាតិ ការផ្សព្វផ្សាយបំផុសចលនាកៀរគររកមូលនិធិក្នុងយុទ្ធនាការផ្សព្វផ្សាយឈានឆ្ពោះទៅទិវា ៨ឧសភា។
លោកប្រធាន បានបន្តទៀតថា ចំពោះការរៀបចំប្រារព្ធព្រះរាជពិធីបុណ្យចម្រើនព្រះជន្មហ្លួងម៉ែ យើងត្រូវរៀបចំទេយ្យវត្ថុប្រគេនដល់ព្រះសង្ឃនៅវត្តមួយចំនួនក្នុងក្រុង ស្រុកទាំង៥ នៃខេត្តព្រះសីហនុ ក្នុងនោះក៏មានវត្តសាមាធិស្ថិតនៅឃុំរាម ស្រុកព្រៃនប់ ដែលព្រះចៅអធិការ គណៈមកម្មការវត្ត និងប្រជាពលរដ្ឋចំណុះជើងវត្តបានចូលរួមសហការជាមួយរដ្ឋបាលខេត្តក្នុងការប្រយុទ្ធប្រឆាំងនឹងជំងឺកូវីដ-១៩ យកទីតាំងវត្តសម្រាប់បូជាសពអ្នកស្លាប់ដោយសារជំងឺកូវីដ-១៩នាពេលកន្លងមក។
សូមបញ្ជាក់ថា ក្នុងឆ្នាំ២០២១ សាខាកាកបាទក្រហមកម្ពុជាខេត្តព្រះសីហនុ បានធ្វើសកម្មភាពចុះចែកស្បៀងជូនប្រជាពលរដ្ឋងាយរងគ្រោះ និងប្រជាពលរដ្ឋរងគ្រោះដោយគ្រោះធម្មជាតិនានាក្នុងក្រុង ស្រុកទាំង៥ បានចំនួន ៤០៨លើក ស្មើនឹង ១២.១៦៨គ្រួសារ ។ ដោយឡែករយៈពេល ៣ខែដើមឆ្នាំ២០២២នេះ សាខាកាកបាទក្រហមខេត្តព្រះសីហនុ បានចុះចែកអំណោយជូនប្រជាពលរដ្ឋងាយរងគ្រោះ និងរងគ្រោះធម្មជាតិបានចំនួន ៥២លើក ស្មើនឹង ១.៤៥៣គ្រួសារផងដែរ៕
ដោយ៖សហការី
