UEFA បានសម្រេចថា ក្លិប Atletico Madrid ត្រូវតែបិទផ្នែកខ្លះនៃកីឡដ្ឋានរបស់ពួកគេសម្រាប់ការប្រកួតជើងទី២វគ្គ៨ក្រុមចុងក្រោយ Champions League ទល់នឹងក្រុម Manchester City នៅរាត្រីថ្ងៃពុធ ទី១៣ ខែមេសានេះ។

ម្ចាស់ជើងឯកអេស្ប៉ាញត្រូវតែបិទយ៉ាងហោចណាស់៥,០០០កៅអីនៅ Wanda Metropolitano ដែលមានសមត្ថភាព៦៨,៤៥៦កៅអី។ ការដាក់ទណ្ឌកម្មរបស់ UEFA គឺសម្រាប់ “អាកប្បកិរិយារើសអើង” របស់អ្នកគាំទ្រ Atletico Madrid ក្នុងការប្រកួតជើងទី១កាលពីសប្តាហ៍មុននៅទីក្រុង Manchester ដែល Man City ឈ្នះ១ទល់០។ក្រុម Atletico Madrid ក៏​នឹង​ត្រូវ​បង្ហាញ​បដា UEFA ដែល​អាន​ថា “#NoToRacism” មានន័យថា “គ្មានការរើសអើងជាតិសាសន៍”។ ទន្ទឹមនឹងនេះ UEFA បានផ្អាកបណ្ដោះអាសន្នគ្រូបង្វឹកអ្នកចាំទី Roma លោក Nuno Santos និងគ្រូបង្វឹកក្រុម Bodo/Glimt លោក Kjetil Knutsenខណៈដែលពួកគេស៊ើបអង្កេតការចោទប្រកាន់រវាងអ្នកទាំង២ បន្ទាប់ពីការប្រកួត Europa Conference League កាលពីថ្ងៃព្រហស្បតិ៍សប្តាហ៍មុន។ក្រុម Bodo/Glimt បានយកឈ្នះ ២-១ លើក្រុម Roma របស់លោក Jose Mourinho ក្នុងការប្រកួតជើងទីមួយនៃវគ្គ១/៤ផ្តាច់ព្រ័ត្រ ពានរង្វាន់ Europa Conference League។ ជាមួយគ្នានេះក្លិប​ន័រវេស​មួយនេះបាន​ចេញ​សេចក្តី​ថ្លែងការណ៍​មួយ​ដែល​បាន​បញ្ជាក់​ថា ​ពួកគេ​មាន​ភស្តុតាង​ជា​វីដេអូ​ដែល​ថា ​គ្រូបង្វឹក​លោក Knutsen ត្រូវ​បាន​វាយប្រហារ​ដោយ​សមាជិក​ក្រុម​ជំនួយ​របស់ Roma រួម​ទាំងក្រុម Santos ផង​ដែរ។

ជាការឆ្លើយតបទៅនឹងការសម្រេចចិត្តរបស់ UEFA ក្នុងការព្យួរលោកKnutsen គ្រូបង្វឹកក្រុម Bodo/Glimt បានចេញសេចក្តីថ្លែងការណ៍មួយដោយនិយាយថា “យើងមានការភ្ញាក់ផ្អើល និងតក់ស្លុតចំពោះការសម្រេចចិត្តរបស់ UEFA។ យើងនឹងប្តឹងឧទ្ធរណ៍ ហើយនឹងធ្វើការលើវាពេញមួយល្ងាច។ លើសពីនេះទៅទៀត បច្ចុប្បន្ននេះយើងមិនមានមតិយោបល់អ្វីនោះទេ” ៕ (រូបភាព ៖​ BBC Sport)