ខេត្តស្វាយរៀង៖ មានការភ្ញាក់ផ្អើលពីសំណាក់ក្រុមគ្រួសារនិងអ្នកភូមិខណៈដែលពួកគាត់ប្រទះឃើញបុរសម្នាក់ចងកសម្លាប់ខ្លួនក្នុងបន្ទប់ទឹក ហើយក៏បានរាយការណ៍ទៅសមត្ថកិច្ចឱ្យមកពិនិត្យសព។

ហេតុការណ៍នេះបានកើតឡើងកាលពីវេលាម៉ោង១និង៣០នាទីរសៀល
ថ្ងៃទី១៨ ខែមេសា ឆ្នាំ២០២២
នៅក្នុងភូមិប្រសប់លាក់ សង្កាត់បាវិត ក្រុងបាវិត ខេត្តស្វាយរៀង។

តាមសមត្ថកិច្ចនគរបាលក្រុងបាវិតបានឱ្យដឹងថា បុរសខាងលើមានឈ្មោះ
ម៉ែន សារាប អាយុ២៤ឆ្នាំ មុខរបរកសិករ មានទីលំនៅភូមិប្រសប់លាក់ សង្កាត់បាទី ក្រុងបាវិត ខេត្តស្វាយរៀង។

ក្រោយពីទទួលបានព័ត៌មានភ្លាមកម្លាំងជំនាញបច្ចេកទេសនគរបាលក្រុងបាវិតបានសហការជាមួយកម្លាំងនគរបាលប៉ុស្តិ៍រដ្ឋបាលនិងគ្រូពេទ្យបង្អែកជីភូចុះទៅពិនិត្យសព រួចសន្និដ្ឋានថា ឈ្មោះ ម៉ែន សារាបពិតជាធ្វើអត្តឃាតចងកសម្លាប់ខ្លួនប្រាកដមែន ដោយបានយកខ្សែចងក្របីមកចងកភ្ជាប់នឹងធ្នឹមបន្ទប់ទឹកដែលមានកម្ពស់២ម៉ែត្រ៣០សង់ទីម៉ែត្របណ្តាលឱ្យស្លាប់។

តាមអ្នកភូមិបានឱ្យដឹងថា បុរសខាងលើគឺមានជំងឺប្រចាំកាយដោយព្យាបាលនិងផឹកថ្នាំសង្កូវដែរប៉ុន្តែមិនបានធូរស្រាលសោះ ស្រាប់តែនៅរសៀលថ្ងៃទី១៨ខែមេសាឆ្នាំ២០២២មានការភ្ញាក់ផ្អើលថា អ្នកជំងឺរូបនេះបានចងកក្នុងបន្ទប់ទឹកស្លាប់បាត់ទៅហើយ។

សាកសពត្រូវបានសមត្ថកិច្ចធ្វើកំណត់ហេតុនិងប្រគល់ជូនក្រុមគ្រួសារធ្វើបុណ្យតាមប្រពៃណី៕

ដោយ៖ យឹម សុថាន