ខេត្តព្រះសីហនុ៖ បុរសជនជាតិចិនម្នាក់ សង្ស័យប្រើប្រាស់គ្រឿងញៀនហួសកម្រិត រហូតឈានដល់ការបាត់បង់ស្មារតីបានធ្វើសកម្មភាពអារដៃខ្លួនឯង រួចក៏លោតសម្លាប់ខ្លួនពីលើសណ្ឋាគារយីហោ” ស៉ីយ៉ាធូ” កម្ពស់១៣ជាន់បណ្តាលឱ្យស្លាប់ភ្លាមៗ នៅក្នុងថ្លុកឈាម។ នេះបេីយោងតាមសេចក្តីរាយការណ៍របស់ប្រជាពលរដ្ឋដែលទេីបទទួលបាន នៅព្រឹកថ្ងៃអង្គារទី២៦ ខែមេសា ឆ្នាំ២០២២។
សេចក្តីរាយការណ៍ដដែល បានបន្តថា ហេតុការណ៍ខាងលេីនេះបានកើតឡើងកាលពីវេលាម៉ោង ៩ ព្រឹកថ្ងៃទី២៥ ខែមេសា ឆ្នាំ២០២២ម្សិលមិញនេះ ស្ថិតនៅចំណុចសណ្ឋាគារយីហោ” ស៉ីយ៉ាធូ”ស្ថិតក្នុងភូមិ២ សង្កាត់លេខ២ ក្រុងព្រះសីហនុ ខេត្តព្រះសីហនុ ។
ជុំវិញករណីនេះដែរ បេីតាមការបញ្ជាក់ពីសមត្ថកិច្ចនគរបាលមូលដ្ឋាន បានឱ្យដឹងថា ជនរងគ្រោះជាជនជាតិចិន ភេទប្រុស មិនទាន់ស្គាល់អត្តសញ្ញាណនោះទេ។ មូលហេតុអាចមកពីការប្រើប្រាស់ថ្នាំញៀនលើសកំរិត រហូតឈានដល់ការបាត់បង់ស្មារតី និងគ្រប់គ្រងសតិអារម្មណ៍ខ្លួនឯងលែងបាន ក៏យកកាំបិតមកអារដៃខ្លួនឯង រួចសម្រេចចិត្តលោតសម្លាប់ខ្លួនពីជាន់ទី១៣ មកដីបណ្តាលឱ្យស្លាប់ភ្លាមៗនៅក្នុងថ្លុកឈាមតែម្តង។
ក្រោយកើតហេតុសពបុរសជនជាតិចិនរូបនេះ ត្រូវបានសមត្ថកិច្ច វេចខ្ចប់យកទៅរក្សាទុករង់ចាំ អនុវត្តបន្តតាមនីតិវិធី និងប្រគល់ជូនស្ថានទូត ដើម្បីបញ្ជូនទៅស្រុកកំណើតវិញ៕
ដោយ៖សហការី
