ភ្នំពេញ៖ ថ្នាក់ដឹកនាំក្រសួងមហាផ្ទៃ និងអង្គភាពប្រឆាំងអំពើពុករលួយ អាចបើកការ ស៊ើបអង្កេត ស្រាវជ្រាវ រកនូវកំហុសអំពើពុករលួយ ភាពមិនប្រក្រតី របស់មន្ត្រីនគរបាលយុត្តិធម៌ របស់អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្ក គ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម ខណៈអង្គភាពនេះក្លាយទៅជាការប្រើជំនាញកៀបទារលុយពីអ្នករកសុី ប្រព្រឹត្តដោយមន្ត្រីមួយចំនួនខ្លះ ប្រើតួនាទី ភារកិច្ច កៀបយកលុយ សាហាវបំផុត ។

សូមមរម្លឹកថា, រឿងលោកស័ក្តិ៥ ហ៊ុយ សុងហាក់ មិនទាន់បើក ការស៊ើបអង្កេត ស្រាវជ្រាវ រកអោយឃើញរឿងអំពើពុករលួយកៀបយកលុយចិនផង ។ ដល់ឥឡូវបែកធ្លាយទៀតហើយ ! និងគួរអោយអាសូរដល់អាជីវករជនជាតិចិន ដែលខំមករកស៊ីនៅកម្ពុជា ត្រូវបានក្រុមប្រតិបត្តិការ របស់អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ ក្រុមទី៦ ចុះមកបិទសុីល (បិទឃ្លាំង) តាំងពីថ្ងៃទី៤ ខែមេសា ឆ្នាំ២០២២ រងចាំការចចារយកប្រាក់ពីម្ចាស់ទីតាំង រហូតដល់ថ្ងៃទី១៣ ខែមេសា ឆ្នាំ២០២២ ទើបបើកអោយវិញ ដែលបែកធ្លាយដូចពាងប្រហុកថា, ក្រុមហ៊ុននេះត្រូវគេសំណូមពរអោយជួយត្រឹម ៣មុឺនដុល្លារ ។ ប៉ុន្តែចចារធ្លាក់ចុះប្រហាក់ប្រហែលជា ២មុឺនដុល្លារ ក៏ Okay 🆗 ។ 

សូមបញ្ជាក់ថា, ក្រុមប្រតិបត្តិការទី៦ នៃអង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ កាលពីព្រឹកថ្ងៃទី៤ ខែមេសា ឆ្នាំ២០២២ បានចុះមកត្រួតពិនិត្យទីតាំងឃ្លាំងលេខ WH-09 ស្ថិតនៅភូមិត្រពាំងស្វាយ សង្កាត់គោកឃ្លៀង ខណ្ឌសែនសុខ រាជធានីភ្នំពេញ  កន្លងទៅ ។ បន្ទាប់មកធ្វើកំណត់ហេតុផ្អាកសកម្មភាព បណ្តោះអាសន្ន នៅវេលាម៉ោង១និង០៥នាទីថ្ងៃទី៤ ខែមេសា ឆ្នាំ២០២២ ដោយលោកវរសេនីយ៍ឯក កុល ភិរ័ត្ន ឋានៈអនុប្រធានមន្ទីរពិសោធន៍ ជានាយនគរបាលយុត្តិធម៌ និងមានជំនួយការលោកវរសេនីយ៍ត្រី វណ្ណ សីហនាថ នាយរងការិយាល័យ នៃលេខាធិការដ្ឋាន(គ.ប.ផ.ក) ។ ដឹកនាំសម្របសម្រួលនីតិវិធី ដោយលោក ចែ សុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ  ក្នុងនោះមានសមាសភាពចូលរួម: 

១-លោកឧត្តមសេនីយ៍ទោ តាន់ គុណតារា ឋានៈអនុប្រធានលេខាធិការដ្ឋាន 

២-លោកវរសេនីយ៍ឯក សំ វាសនា ឋានៈអនុប្រធានមន្ទីរពិសោធន៍

៣-លោកវរសេនីយ៍ទោ ហេង ណារ៉ាក់ ឋានៈអនុប្រធានលេខាធិការ 

៤-លោកវរសេនីយ៍ទោ ម៉ា ចាន់ណារិទ្ធ ឋាន:អនុនាយរងការិយាល័យ

៥-លោកវរសេនីយ៍ទោ តាន់ ប៉ារីស ឋាន:អនុនាយរងការិយាល័យ

៦-លោកវរសេនីយ៍ត្រី នង សីថេង ឋានៈនាយផ្នែកលេខាធិការដ្ឋាន

៧-លោកវរសេនីយ៍ទោ ប៊ិន បូរាវង្ស ឋានៈមន្ត្រីលេខាធិការដ្ឋាន និងសរុប១២នាក់។ 

សូមជម្រាបជូនថា, ម្ចាស់ទីតាំងមានឈ្មោះ លោក Fin Zhigeling ហើយឃ្លាំងនោះមានប្រភេទទំនិញ មី និងគ្រឿងទេស។ 

ប្រភពបែកធ្លាយថា, ខាងក្រុមប្រតិបត្តិការទី៦ អាចចចារនៅត្រឹមប្រហាក់ប្រហែលជា២មុឺន ទើបបើកឃ្លាំងវិញ នៅថ្ងៃទី១៣ ខែមេសា ឆ្នាំ២០២២។ 

ពាក់ព័ន្ធករណីនេះ លោកឧត្តមសេនីយ៍ទោ តាន់ គុណតារា ឋានៈអនុប្រធានលេខាធិការដ្ឋាន  ជាមួយអង្គភាព មជ្ឈមណ្ឌលសារព័ត៌មាន”នគរវត្ត” នៅរសៀលថ្ងៃទី២ ខែឧសភា ឆ្នាំ២០២២ លោកបានប្រាប់ថា, ខ្ញុំបានចុះមើលកិច្ចការនេះ ហើយមិនបានចចារអ្វីទេ កុំជឿគេ ព្រោះក្រុមការងារធ្វើតាមនីតិវិធី និងឆ្លងយោបល់តំណាងអយ្យការជាប់ជាប្រចាំ ។ លោកបន្តថា, បើប្អូនមិនជឿសួរទៅអយ្យការដឹងហើយ ។ 

ដោយឡែកលោកឧត្តមសេនីយ៍ឯក តាន់ សុវិជ្ជា ប្រធានលេខាធិការដ្ឋាន អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្ក គ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម បានបញ្ជាក់ថា, ចំពោះរឿងនេះ ខ្ញុំមិនបានឮសូរចឹងទេ ប៉ុន្តែអាចសួរទៅ លោក កុល ភិរ័ត្ន ផ្ទាល់បាន ព្រោះគាត់ចុះទៅត្រួតពិនិត្យ ។  ចំពោះ លោក កុល ភិរ័ត្ន អង្គភាព មជ្ឈមណ្ឌលសារព័ត៌មាន”នគរវត្ត” មិនអាចសុំការបំភ្លឺបានទេ ថាតើពាក់ព័ន្ធនឹងការចរចារនោះឬរឿងទារលុយដូចខាងលើ ខណៈគ្មានលេខទូរស័ព្ទទាក់ទង ។ 

លោកឧត្តមសេនីយ៍ឯក សរ សិទ្ធិ អនុរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្ក គ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម ជាប្រធានស្តីទី មិនអាចសុំការបកស្រាយបានទេ ដោយទូរស័ព្ទចូលគ្មានអ្នកទទួល។

ទោះបីយ៉ាងណាក៏ដោយ មេត្តាប្រធាន សាមីអង្គភាព ស៊ើបអង្កេត ស្រាវជ្រាវ រកមុខមន្ត្រីខិលខូច ដែលជាប់ពាក់ព័ន្ធនឹងអំពើពុករលួយ ខណៈអង្គភាពមួយនេះ កំពុងធំក្លិនដូចបែកពាងប្រហុកទៅហើយ ។ ល្បីបំផុត! ខាងចុះឆែកឆេរ ទោះបីជាមានច្បាប់ទម្លាប់ត្រឹមត្រូវ ក៏ដោយ រួចហៅម្ចាស់ទីតាំងមកធ្វើកំណត់ហេតុ ស្តាប់ចម្លើយ រួចហើយកុះរុសគ្រប់វិធីសាស្រ្ត តាមជំនាញ ទាញរកផលប្រយោជន៍ ធ្វើអោយប៉ះពាល់កិត្តិយសអង្គភាពធ្ងន់ធ្ងរណាស់។

សូមបញ្ជាក់ថា, លោកឧត្តមសេនីយ៍ឯក សរ សិទ្ធិ អនុរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្ក គ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម ជាប្រធានស្តីទី បានទូរស័ព្ទមកកាន់ទីប្រឹក្សាជាន់ខ្ពស់ មជ្ឈមណ្ឌលសារព័ត៌មាន”នគរវត្ត” វិញ នៅវេលាម៉ោង២និង១៧នាទីរសៀល ថ្ងៃទី២ ខែឧសភា ឆ្នាំ២០២២  ប៉ុន្តែលោកអះអាងថា, គាត់សូមទោសដោយមិនបានលើកទូរស័ព្ទ ទោះជាយ៉ាងណាខ្ញុំនឹងឆ្លើយបកស្រាយជូន នៅពេលល្ងាច ខណៈពេលដល់ម៉ោងចូលប្រជុំ ចាំល្ងាចមេត្តាទូរស័ព្ទមកចុះ កុំភ្លេច ខ្ញុំរងចាំជានិច្ច ៕

លោកឧត្តមសេនីយ៍ទោ តាន់ គុណតារា ឋានៈអនុប្រធានលេខាធិការដ្ឋាន 

លោកឧត្តមសេនីយ៍ឯក តាន់ សុវិជ្ជា ប្រធានលេខាធិការដ្ឋាន អង្គភាពគណៈកម្មាធិការប្រយុទ្ធប្រឆាំងផលិតផលក្លែងក្លាយ

ដោយ : មជ្ឈមណ្ឌលសារព័ត៌មាន”នគរវត្ត “