ភ្នំពេញ៖ បើយោងតាមការបញ្ជាក់របស់អ្នកនាំពាក្យ និងជាអគ្គលេខាធិការ រដ្ឋសភា លោក ឡេង ប៉េងឡុង គឺរដ្ឋសភានឹងធ្វើការបោះឆ្នោតជ្រើសតាំងអ្នកតំណាងរាស្ត្រ កែប ជុតិមា ដើម្បីចូលកាន់មុខតំណែងជាប្រធានគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា ជំនួសសម្ដេចឧត្តមទេពញាណ ហ៊ុន ណេង នាថ្ងៃស្អែកនេះ។

លោក ឡេង ប៉េងឡុង បានបញ្ជាក់ប្រាប់សារព័ត៌មាន ថា រដ្ឋសភាបានទទួលសំណើរពីគណបក្សប្រជាជនរួចហើយដើម្បីស្នើជ្រើសតាំងនេះ ខណៈលោកថាតាមនីតិវិធីការបោះឆ្នោតជ្រើសតាំងនឹងធ្វើនៅថ្ងៃស្អែកតែម្ដង។

អ្នកនាំពាក្យ និងជាអគ្គលេខាធិការ រដ្ឋសភា លោក ឡេង ប៉េងឡុង បន្តថា៖ «យើងរៀបចំតាមនីតិវិធី គឺថ្ងៃស្អែកនឹងបោះឆ្នោតជ្រើសតាំងជំនួសសម្ដេច ហ៊ុន ណេង»។

សមាជិកសភា និងជាប្រធានគណកម្មការទី៤ គណកម្មការមហាផ្ទៃ ការពារជាតិ និងមុខងារសាធារណៈ សម្ដេចឧត្តមទេពញាណ ហ៊ុន ណេង បានទទួលមរណភាពក្នុងជន្មាយុ ៧២ឆ្នាំ កាលពីល្ងាចម៉ោងប្រមាណ ៦និង២៥នាទី ថ្ងៃទី៥ ខែឧសភា ឆ្នាំ២០២២នេះ ដោយសារគាំងបេះដូង។

សូមបញ្ជាក់ថា, រដ្ឋធម្មនុញ្ញនៃព្រះរាជាណាចក្រកម្ពុជា មាត្រា ៩៥បានចែងថា ក្នុងករណីមានសមាជិករដ្ឋសភាទទួលអនិច្ចកម្ម លាលែង ឬប្រាសចាកសមាជិកភាព ដែលកើតមានឡើង៦ខែ យ៉ាងតិច មុនចប់នីតិកាល ត្រូវចាត់ការជ្រើសតាំងជំនួសសមាជិកនោះតាមល័ក្ខខ័ណ្ឌកំណត់ក្នុងបទបញ្ជាផ្ទៃក្នុងរដ្ឋសភា និងក្នុងច្បាប់បោះឆ្នោត។

ប្រការ១០ ថ្មី នៃបទបញ្ជាផ្ទៃក្នុងសភា កថាខណ្ឌទី១បានសរសេរថា ក្នុងករណីធម្មតា រដ្ឋសភាត្រូវបោះឆ្នោតជ្រើសតាំងដាច់ដោយឡែកពីគ្នានូវសមាជិកគណៈកម្មការនានានៃរដ្ឋសភា។ គណៈកម្មការនីមួយៗ ត្រូវជ្រើសតាំង ប្រធានមួយរូប អនុប្រធានមួយរូប និងលេខាធិការមួយរូបដោយវិធីបោះឆ្នោត។

លោក កែប ជុតិមា អាយុ៧២ឆ្នាំ ធ្លាប់ជាអភិបាលរាជធានីភ្នំពេញអស់រយៈពេល១០ឆ្នាំ ពីឆ្នាំ២០០៣ រហូតដល់ឆ្នាំ២០១៣ បច្ចុប្បន្នជាសមាជិកសភាគណបក្សប្រជាជនកម្ពុជា មណ្ឌលភ្នំពេញ។ 

សូមរម្លឹកថា, ចំពោះមរណភាព សម្ដេចឧត្តមទេពញាណ ហ៊ុន ណេង , សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងប្អូនប្រុស បានសរសេរដ៏ខ្លី ហើយសង្វែគបំផុត ដោយមានប្រសាសន៍ថា, បងប្អូនយើងបែកគ្នាដោយពុំបានលាគ្នា និងនិយាយជាមួយគ្នាសូម្បីមួយម៉ាត់។

សម្តេចតេជោបន្តថា, បែកគ្នាលើកនេះបែកជារៀងរហូតហើយមិនអាចជួបគ្នាវិញបានទេ៕

ដោយ : សិលា