កាលពីថ្ងៃទី២៣ ខែកក្កដា ឆ្នាំ២០១៥ មន្ត្រីអាមេរិកបានថ្លែងថា ប្រទេសទួរគីបានអនុញ្ញាតឲ្យយន្តហោះចម្បាំងអាមេរិកធ្វើសកម្មភាពវាយប្រហារប្រឆាំងទៅលើក្រុមរដ្ឋអិស្លាម IS ពីបន្ទាយជើងអាកាស Incirlik មានមូលដ្ឋាននៅភាគខាងត្បូងរបស់ប្រទេសទួរគី ។
ទីក្រុងអេងការ៉ា និងទីក្រុងវ៉ាស៊ីនតោនបានឈានដល់កិច្ចព្រមព្រៀងជាមួយគ្នា បន្ទាប់ពីកិច្ចពិភាក្សារយៈពេលច្រើនខែកន្លងមក ក៏ដូចជាការប្រកាសឲ្យដឹងក្រោយរយៈពេលមួយថ្ងៃដែលប្រធានាធិបតីអាមេរិក លោកបារ៉ាក់ អូបាម៉ា បានថ្លែងពិភាក្សាស្តីអំពីវិបត្តិក្រុមរដ្ឋអិស្លាមជាមួយសមភាគីទួរគី លោក រីជីព តៃយីប អ៊ីដូហ្គាននោះ ។
ថ្លែងក្នុងលក្ខខណ្ឌមិនបញ្ចេញឈ្មោះ មន្ត្រីក្រសួងការពារជាតិអាមេរិកមួយបានថ្លែងប្រាប់ទីភ្នាក់ងារព័ត៌មាន AFP ថា ការប្រើប្រាស់បន្ទាយទួរគី ដូចជាបន្ទាយជើងអាកាស Incirlik នោះជាសកម្មភាពមួយជួយជំរុញឲ្យប្រតិបត្តិការរបស់កម្លាំងសម្ពន្ធមិត្តកាន់តែមានប្រសិទ្ធភាព ក្នុងកិច្ចខិតខំប្រឹងប្រែងប្រយុទ្ធប្រឆាំងទៅលើក្រុមរដ្ឋអិស្លាម ISIL ។
កិច្ចព្រមព្រៀងនេះបានកើតឡើងផងដែរស្របពេលដែលយោធាទួរគីក៏មានសកម្មភាពទប់ស្កាត់ក្រុមភេរវកម្មរដ្ឋអិស្លាមIS ដែលស្ថិតនៅតាមព្រំដែនជាប់ជាមួយប្រទេសស៊ីរីផងដែរ ហើយដែលកំពុងតែរីកសាយភាយជម្លោះកាន់តែធំឡើងនោះ។ ក្រុមរដ្ឋអិស្លាមបានដណ្តើមគ្រប់គ្រងដែនដីភាគច្រើនរបស់ស៊ីរី និងអ៊ីរ៉ាក ។
ប្រទេសទួរគីមានព្រំដែនប្រវែង៨០០គីឡូម៉ែត្រជាប់ជាមួយស៊ីរី និងនៅព្រំដែនភាគខាងត្បូង ជុំវិញទីតាំងនោះគឺជាទឹកដីដែលកំពុងគ្រប់គ្រងកាន់កាប់ដោយផ្ទាល់របស់ក្រុមរដ្ឋអិស្លាម ។ អាមេរិកបានធ្វើប្រតិបត្តិការទាំងយន្តហោះមានមនុស្សបើក និងទាំងយន្តហោះគ្មានមនុស្សបើកដើម្បីវាយប្រហារពីលើដែនអាកាសក្នុងគោលដៅទៅលើក្រុមរដ្ឋអិស្លាម IS ប៉ុន្តែកាលពីពេលកន្លងមកមិនត្រូវបានអនុញ្ញាប្រើប្រាស់បន្ទាយកងទ័ពជើងអាកាសទួរគីដែលជាសម្ពន្ធមិត្តរបស់អង្គការណាតូនោះឡើយ ។
ស្រ្តីអ្នកនាំពាក្យក្រសួងការពារជាតិអាមេរិក លោកស្រី Laura Seal បានថ្លែងថា យើងបានសម្រេចចិត្តធ្វើប្រតិបត្តិការរបស់យើងឲ្យកាន់តែខ្លាំងក្លាថែមទៀតប្រឆាំងទៅលើក្រុមរដ្ឋអិស្លាម ISIL ការខិតខំប្រឹងប្រែងរបស់យើងគឺដើម្បីលើកស្ទួយសន្តិសុខ និងស្ថិរភាពនៅក្នុងប្រទេសអ៊ីរ៉ាក់ ហើយភារកិច្ចរបស់យើងនឹងនាំមកនូវដំណោះស្រាយនយោបាយក្នុងជម្លោះប្រទេសស៊ីរី ។
ជម្លោះនៅក្នុងប្រទេសស៊ីរីគឺជាការគំរាមកំហែងយ៉ាងខ្លាំងក្លាបំផុតដល់កងកម្លាំងយោធាទួរគី និងក្រុមឧទ្ទាមរដ្ឋអិស្លាម IS ដែលបានចាប់ផ្តើមធ្វើសកម្មភាពដណ្តើមទឹកដីគ្រប់គ្រងនៅក្នុងប្រទេសស៊ីរី និងអ៊ីរ៉ាក់ ជាប់ព្រំដែនទួរគីកាលពីឆ្នាំ២០១៣កន្លងមកនោះ។ ក្រុមឧទ្ទាមបានសម្លាប់ទាហានទួរគីដែលឆ្លងកាត់ព្រំដែន ។
កាលពីដើមសប្តាហ៍នេះ មនុស្ស៣២នាក់បានបាត់បង់ជីវិតដោយសារតែការបំផ្ទុះគ្រាប់បែកអត្តឃាតនៅទីក្រុងទួរគីមួយដែលនៅជាប់ព្រំដែនជាមួយស៊ីរី ។ ការវាយប្រហារនេះត្រូវគេបន្ទោសទៅលើក្រុមរដ្ឋអិស្លាម IS ហើយដែលនាំឲ្យមានអំពើហិង្សាកញ្ជ្រោលឡើងនៅភាគខាងត្បូងទួរគីដែលមានក្រុមឃើដរស់នៅភាគច្រើនគ្រប់គ្រងដោយទួរគីនោះ។
លោកស្រី Seal បានថ្លែងថា ក្នុងនាមជាសម្ពន្ធមិត្ត យើងបានដឹងថា មានការគំរាមកំហែងខ្លាំងណាស់នៅតាមព្រំដែនប្រទេសទួរគី។ យើងនៅតែមានការប្តេជ្ញាការពារទួរគី និងធ្វើការជាមួយប្រទេសទួរគីដើម្បី ពង្រឹងទំនាក់ទំនងរបស់យើងប្រឆាំងការគំរាមកំហែងពីក្រុមបណ្តាញភេរវកម្ម ៕
