ខេត្តស្វាយរៀង៖ មានករណីគ្រោះថ្នាក់ចរាចរណ៍គួរអោយរន្ធត់ខណៈបុរសម្នាក់ជិះម៉ូតូបុករថយន្តកង់តឺន័រឈប់ពីក្រោយយ៉ាងពេញទំហឹងបណ្ដាលអោយធ្លាយខួរស្លាប់នឹងកន្លែងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងយប់។

ហេតុការណ៍នេះបានកើតឡើងកាលពី
វេលាម៉ោង៧និង៤៥នាទីយប់ថ្ងៃទី៣១ខែឧសភាឆ្នាំ២០២២ស្ថិតនៅលើផ្លូវ៣១៤D​នៅភូមិ​ត្រពាំងឆ្លូញឃុំ ញរ​ស្រុកកំពង់រោទិ៍ ខេត្តស្វាយរៀង។

យោងតាមសមត្ថកិច្ចនគរបាលស្រុកបានអោយដឹងថាអ្នកស្លាប់មានឈ្មោះ
កុយ វ៉ាន ប្រុស អាយុ ៣៥ឆ្នាំកម្មករមានទីលំនៅភូមិព្រៃត្រុំឃុំញរស្រុកកំពង់រោទិ៍ខេត្តស្វាយរៀង។

ចំណែកអ្នកបើករថយន្តកុងតឺន័​រ ស្លាកលេខ ភ្នំពេញ ៣B៥៧០៩  សណ្ដោងរម៉ក ពាក់ស្លាកលេខ ភ្នំពេញ ៤A១១៧៦មិនត្រូវបានស្គាល់អត្តសញ្ញាណនោះទេក្រោយកើតហេតុឃើញសភាពការណ៏មិនស្រួលបានរត់គេចខ្លួនភ្លាមៗ។

តាមសាក្សីបានអោយដឹងថាមុនកើតហេតុមានរថយន្តកុងតឺន័រមួយគ្រឿងពាក់ស្លាកលេខ ភ្នំពេញ ៣B៥៧០៩  សណ្ដោងរម៉ក ពាក់ស្លាកលេខ ភ្នំពេញ ៤A១១៧៦ដោយធ្វើដំណើរ
ពីត្បូងទៅជើងហើយក៏បានឈប់ចតលើផ្លូវខណៈនោះស្រាប់តែមានបុរសម្នាក់បានជិះម៉ូតូមួយគ្រឿងម៉ាកហុងដាឌ្រីម ១២៥ពណ៌ខ្មៅ ផលិតឆ្នាំ២០១៨ ពាក់ស្លាកលេខ ស្វាយរៀង ១K០៤២៥ក្នុងទិសដៅស្របគ្នាក៏បុកពីក្រោយ
យ៉ាងពេញទំហឹងបណ្ដាលអោយធ្លាយខួរស្លាប់នឹងកន្លែងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងយប់។

បច្ចុប្បន្នសមត្ថកិច្ចបានវាស់វែងនិងអូសយកវត្ថុតាងម៉ូតូនិងរថយន្តមករក្សាទុក នៅប៉ុស្តិ៍នគរបាលរដ្ឋបាលញរដើម្បី កសាង​សំណុំរឿង​តាមច្បាប់ រីឯ​សាកសព​ត្រូវ​បាន​ប្រគល់​ជូន​ក្រុម​គ្រួសារ​យក​ទៅ​ធ្វើ​បុណ្យ​តាម​ប្រពៃណីទាំងក្ដុកក្ដួលបំផុត។៕

ដោយ៖ យឹម សុថាន