ខេត្តពោធិ៍សាត់៖ ក្មេងទំនើងចំនួន ៣នាក់បានប្រេីកាំបិតផ្គាក់ធ្វេីសកម្មភាពជិះម៉ូតូដេញកាប់យុវជន២នាក់បណ្ដាលឱ្យរបួសធ្ងន់និងស្រាលកាលពីវេលាម៉ោងជាង៦ល្ងាចថ្ងៃទី៣ ខែមិថុនាម្សិលមិញនេះ នៅចំណុចខាងលិចការាសសាំងសំរោង ស្ថិតក្នុងភូមិសំរោង ឃុំសំរោង ស្រុកភ្នំក្រវាញ ខេត្តពោធិ៍សាត់។ ប៉ុន្តែត្រូវបានកម្លាំងនគរបាលស្រុកតាលោសែនជ័យតាមចាប់ឃាត់ខ្លួននៅត្រង់ចំណុចភូមិទួលថ្ម ឃុំតាលោ ស្រុកតាលោសែនជ័យក្រោយពីធ្វើសកម្មភាពរួច។ នេះបើតាមការបញ្ជាក់ពីលោកវរសេនីយ៍ឯក អ៊ុល ហៃ អធិការនគរបាលស្រុកតាលោសែនជ័យដែលបានឱ្យដឹងនៅព្រឹកថ្ងៃសៅរ៍ទី៤ ខែមិថុនា ឆ្នាំ២០២២នេះ។
លោកវរសេនីយ៍ឯក អ៊ុល ហៃ អធិការនគរបាលស្រុកតាលោសែនជ័យបានឱ្យដឹងទៀតថា ក្មេងទំនើងទាំង៣នាក់នេះ ទី១-ឈ្មោះ ផុន រស្មី អាយុ២១ឆ្នាំ មុខរបរ កសិករ រស់នៅភូមិនិគមន៍ ឃុំស្វាយដូនកែវ ស្រុកបាកាន, ទី២-ឈ្មោះ រឹម រឺសាន់ អាយុ២០ឆ្នាំ មុខរបរនិស្សិត រស់នៅភូមិទួលទទឹង ឃុំតាលោ ស្រុកតាលោសែនជ័យ និងទី៣-ឈ្មោះ ប្រុស សំណាង អាយុ១៨ឆ្នាំ មុខរបរសិស្ស រស់នៅភូមិទួលទទឹង ឃុំតាលោសែនជ័យ (ជាអ្នកកាន់កាំបិតផ្គាក់) ។
ចំណែកជនរងគ្រោះទាំង២នាក់នោះ ម្នាក់មានឈ្មោះ ទិត បញ្ញា អាយុ១៨ឆ្នាំ មុខរបរសិស្សសាលា នៅក្នុងភូមិស្តុកខ្លា ឃុំរំលេច ស្រុកបាកាន និងម្នាក់ទៀតឈ្មោះ រិន ថារិទ្ធ អាយុ២១ឆ្នាំ មុខរបរ ជាកសិករ រស់នៅភូមិខ្នារទទឹង ឃុំខ្នារទទឹង ស្រុកបាកាន ខេត្តពោធិ៍សាត់។
លោកអធិការស្រុក បានបន្ថែមថា ជុំវិញអំពើហិង្សាដោយចេតនានេះដែរ យើងមិនទាន់ថាមកពីរឿងគំនុំ ឬយ៉ាងណានោះទេ ខណៈដែលជនសង្ស័យបានធ្វេីសកម្មភាពកាប់ជនរងគ្រោះឱ្យរងរបួស ហើយភ្លាមៗនោះជនរងគ្រោះបានព្យាយាមបើកម៉ូតូរត់គេចខ្លួនចេញពីកន្លែងកើតហេតុដេីម្បីឱ្យគេឯងជួយ។
លោកអធិការបន្តថា ជនរងគ្រោះឈ្មោះ ទិត បញ្ញា បានបើកម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ 1HT-5845 គេចខ្លួនមកដួលនៅចំណុចមុខសាលាបឋមសិក្សាកណ្ដាល លើផ្លូវក្រាលកៅស៊ូ ស្ថិតក្នុងភូមិកណ្ដាល ឃុំផ្ទះរុង ស្រុកតាលោសែនជ័យ បណ្ដាលឱ្យរងរបួសស្រាល។ ចំណែកជនរងគ្រោះឈ្មោះ រិន ថារិទ្ធ បានបើកម៉ូតូ ម៉ាកហុងដា ឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ បាត់ដំបង 1T -1128 គេចខ្លួនមកដួលនៅខាងជើងសាលាបឋមសិក្សាកណ្តាលចម្ងាយប្រហែលជា ៥០០ម៉ែត្រ លើចិញ្ចើមផ្លូវក្រាលកៅស៊ូ បណ្ដាលឱ្យរងរបួសធ្ងន់ ត្រូវបានបងប្អូនសាច់ញាតិដឹកយកទៅសង្គ្រោះបន្ទាន់នៅមណ្ឌលសុខភាព តាលោសែនជ័យ តែដោយស្ថានភាពរបួសមានសភាពធ្ងន់ធ្ងរពេកក៏បានត្រូវបញ្ជូនបន្តទៅមន្ទីរពេទ្យបង្អែកខេត្តពោធិ៍សាត់។
ដោយឡែកជនសង្ស័យទាំង៣នាក់ ក្រោយពីធ្វើសកម្មភាពកាប់លើជនរងគ្រោះរួចមក បានជិះម៉ូតូមួយគ្រឿងម៉ាកវីណា ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ពោធិ៍សាត់ 1S-8899 គេចខ្លួនចូលមកក្នុងទឹកដីស្រុកតាលោសែនជ័យដែរ ហើយត្រូវនគរបាលស្រុកតាលោសែនជ័យ ដឹកនាំបញ្ជាដោយផ្ទាល់ពីរូបលោក ( អ៊ុល ហៃ) បានចេញពួនស្ទាក់នៅតាមចំណុចនិងគោលដៅផ្សេងៗ ក្នុងភូមិសាស្ត្ររបស់ខ្លួន ហើយក៏បានឃាត់ជនសង្ស័យបាន៣នាក់ ព្រមទាំងបានដកហូតម៉ូតូមួយគ្រឿង និងកាំបិតផ្គាក់មួយនៅត្រង់ចំណុចភូមិទួលថ្ម ឃុំតាលោ ។
នៅចំពោះមុខសមត្ថកិច្ច ជនសង្ស័យទាំង៣នាក់បានឆ្លើយសារភាពថា៖ ពួកខ្លួនពិតជាបានធ្វើសកម្មភាពជិះម៉ូតូដេញកាប់ទៅលើជនរងគ្រោះនៅចំណុចខាងលើប្រាកដមែន ។ ក្រោយសាកសួររួច កម្លាំងនគរបាលស្រុកតាលោសែនជ័យ បានកសាងសំណុំរឿងបញ្ជូនជនសង្ស័យ រួមនឹងវត្ថុតាងទៅកាន់ស្នងការដ្ឋាននគរបាលខេត្តពោធិ៍សាត់ ដើម្បីចាត់ការបន្តតាមនីតិវិធី៕
ដោយ៖សហការី
