ភ្នំពេញ៖ ក្រុមប្រឹក្សាខណ្ឌប្ញស្សីកែវ អាណត្តិទី៣ បានរៀបចំ វេទិកាផ្សព្វផ្សាយ និងពិគ្រោះយោបល់ ឆ្នាំ២០២២ នៅសង្កាត់ស្វាយប៉ាក នៅថ្ងៃអង្គារ ៦ រោច ខែអាសាឍ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៩ ខែកក្កដា ឆ្នាំ២០២២ វេលាម៉ោង ០៨ និង ០០ នាទីព្រឹក ក្រោមអធិបតីភាព លោក ជុំ បាយ័នវិបុល ប្រធានក្រុមប្រឹក្សាខណ្ឌ និងលោក ឯក ឃុនដឿន អភិបាល នៃគណៈអភិបាលខណ្ឌ។
វេទិកាខាងលើនេះ ក៏មានការអញ្ជើញចូលរួមពី លោក លោកស្រី សមាជិក សមាជិកា ក្រុមប្រឹក្សាខណ្ឌ , លោក លោកស្រីអភិបាលរងខណ្ឌ , លោកអធិការនគរបាលខណ្ឌ , លោកតំណាងយោធភូមិភាគពិសេសប្រចាំខណ្ឌ , លោកនាយក-នាយករងរដ្ឋបាលខណ្ឌ , លោកប្រធានការិយាល័យប្រជាពលរដ្ឋ , លោកប្រធានសាខាពន្ធដារខណ្ឌ, ប្រធានការិយាល័យ នៃរចនាសម្ព័ន្ធរដ្ឋបាលខណ្ឌ , មន្ត្រីរាជការ , លោក លោកស្រី ប្រធាន-សមាជិក សមាជិកា ក្រុមប្រឹក្សាសង្កាត់ , លោកនាយនគរបាលប៉ុស្តិ៍សង្កាត់ , តំណាងអគ្គិសនីកម្ពុជា , តំណាងរដ្ឋាករទឹកស្វយ័តក្រុងភ្នំពេញ , តំណាងអង្គការសង្គមស៉ីវិល , តំណាងវិស័យឯកជន , ប្រធានសណ្ដាប់ធ្នាប់ខណ្ឌ, ប្រធាន-អនុប្រធាន-សមាជិក ភូមិ , នាយកសាលារដ្ឋ និងប្រជាពលរដ្ឋ សរុបចំនួន ១៣៨នាក់។
វេទិកាខាងលើនេះដែរ ផ្ដោតលើរបៀបវារៈចំនួនបី ដើម្បីលើកមកពិភាក្សា រួមមាន ៖ ១- ការងារសន្តិសុខ សណ្ដាប់ធ្នាប់ និងសុវត្ថិភាពសង្គម ២- ការងារអភិវឌ្ឍមូលដ្ឋាន និង ៣- ការងារសុខុមាលភាពសង្គម ។ ចំពោះសំណូមពរ សំណួរ និងបញ្ហា ដែល សមាជិក សមាជិកាអង្គវេទិកា បានចូលរួមមតិ រួមមាន ៖ បញ្ហា/សំណូមពរ ជាលាយលក្ខណ៍អក្សរ មានចំនួន ១១ និង ផ្ទាល់មាត់ មានចំនួន ០៤ ដែលត្រូវបានបកស្រាយបំភ្លឺដោយ គណៈអធិបតី និងផ្នែកពាក់ព័ន្ធនានា។ អង្គវេទិកាបញ្ចប់ នៅវេលាម៉ោង១០ និង០០ នាទីព្រឹកថ្ងៃខែឆ្នាំដដែល៕
ដោយ៖ស តារា
