ខេត្តស្វាយរៀង : នាព្រឹកថ្ងៃអង្គារ ១៣រោចខែអាសាឍ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី២៦ ខែកក្កដា ឆ្នាំ២០២២ លោកឧត្តមសេនីយ៍ទោ អុិន សុងនាយករងមន្ទីរប្រឆាំងគ្រឿងញៀន បានដឹកនាំប្រតិភូUNODCចំនួន៤រូប ដេីម្បីអញ្ជេីញទស្សនកិច្ចទីតាំង រោងចក្រផលិតគ្រឿងញៀនមួយកន្លែង ស្ថិតនៅភូមិចុងព្រែក សង្កាត់-ក្រុង-ខេត្តស្វាយរៀង ដែលមានសមាសភាពអញ្ជើញចូលរួមដូចខាងក្រោម ៖
1. ចៅក្រមស៊ើបសួរនិងក្រឡាបញ្ជីរនៃសាលាដំបូងរាជធានីភ្នំពេញ
2. ព្រះរាជអាជ្ញានៃអយ្យការអមសាលាដំបូងខេត្តស្វាយរៀង
3. លោកស្រីអគ្គលេខាធិការរងនិងជាប្រធានមន្ទីរពិសោធន៍ នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន
4. លោកអនុប្រធាននាយកដ្ឋានអនុវត្តច្បាប់នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន
5. លោកស្នងការរង លោកនាយការិយាល័យ លោកមេបញ្ជាការរងកងរាជអាវុធហត្ថ នៃខេត្តស្វាយរៀង
6. លោកស្រីចៅសង្កាត់ស្វាយរៀងនិងមេភូមិចុងព្រែក ព្រមទាំងសហការីអមដំណើរមួយចំនួន។
ក្នុងឱកាសនោះដែរ លោកឧត្តមសេនីយ៍ទោ អុិន សុង នាយករងមន្ទីរប្រឆាំងគ្រឿងញៀន ព្រមទាំងលោកស្រីអគ្គលេខាធិការរងនិងជាប្រធានមន្ទីរពិសោធន៍នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានធ្វើការបើកទីតាំងឃ្លាំងរោងចក្រផលិតគ្រឿងញៀន ខាងលើ ចំនួនបីឃ្លាំងជាបន្តបន្ទាប់ និងបានធ្វើបទបង្ហាញអំពី ឧបករណ៍សម្ភារៈ និងប្រតិបត្តិការនៃការផលិតមួយចំនួន រួមទាំងបង្ហាញពីសារធាតុគីមីផ្សំមួយចំនួននៅក្នុងទីតាំងរោងចក្រផលិតជាក់ស្ដែង ជូនដល់គណៈប្រតិភូUNODCជ្រាប ព្រមទាំងបានធ្វើការបិទទីតាំងឃ្លាំងខាងលេីតាមនីតិវិធី នៅវេលាម៉ោង១១និង១០នាទីព្រឹកនាថ្ងៃខែឆ្នាំដដែល៕
ដោយ ស សម
