ភ្នំពេញ៖ លោកជា អូន រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជាបានថ្លែងប្រាប់អ្នកសារព័ត៌មាននៅថ្ងៃទី២៩ខែកក្កដានេះ ថា ក្រុមហ៊ុនអាកាសចរណ៍ប្រទេសចិនចំនួន១១ក្រុមហ៊ុនដែលបានដាក់ពាក្យ ស្នើសុំបើកជើងហោះហើរត្រង់មកកម្ពុជានោះ នឹងចាប់ផ្តើមដំណើរការពីខែតុលា ឆ្នាំ២០២២នេះតទៅហើយ។
សូមបញ្ជាក់ថា ក្រុមហ៊ុនអាកាសចរណ៍របស់ប្រទេសចិន ចំនួន១១ក្រុមហ៊ុនបានដាក់សំណើទៅរដ្ឋលេខាធិការដ្ឋានអាកាសចរណ៍ស៊ីវិលកម្ពុជា ដើម្បីបើកជើងហោះហើរត្រង់មកកម្ពុជាឡើងវិញ។ លោកបានបញ្ជាក់ថា ក្នុងចំណោមក្រុមហ៊ុនទាំង១១ដែលដាក់សំណើសុំបើកជើងហោះហើរមកកម្ពុជានោះ គឺមានក្រុមហ៊ុនដាក់សំណើហោះហើរមករាជធានីភ្នំពេញមាន១១ក្រុមហ៊ុន ហោះទៅខេត្តសៀមរាប ៣ក្រុមហ៊ុន និងហោះទៅខេត្តព្រះសីហនុមាន៣ក្រុមហ៊ុន។
លោកជា អូន បានធ្វើការសន្និដ្ឋានថា សម្រាប់ការដាក់សំណើសុំបើកជើងហោះហើរត្រង់ពីចិនមកកម្ពុជានេះ អាចទំនងមកពីប្រទេសចិនមានការបន្ធូរបន្ថយការអនុវត្តគោលនយោបាយសូន្យកូវីដ ឬ Zero Covid នៅក្នុងប្រទេសចិន ។ លោកបន្តថា នៅក្នុងខែមិថុនាចុងក្រោយនេះមានអ្នកដំណើរអន្តរជាតិចូលមកកម្ពុជាតាមផ្លូវអាកាសជាង១៩ម៉ឺននាក់ និងមានយន្តហោះចុះចតប្រមាណ២៦%នៃចំនួនការចុះចតសរុបឆ្នាំ២០១៩ និងមានយន្តហោះហោះរំលងប្រទេសកម្ពុជាមានប្រមាណ៧០% ធៀបនឹងឆ្នាំ២០១៩ដូចគ្នា។
លោក ជា អូន បន្តថា នៅក្នុងតារាងកម្មវិធីហោះហើរពីបណ្តាប្រទេសនានាមកកាន់កម្ពុជាដែលបាននិងកំពុងអនុវត្តរយៈពេលជិត៥ខែមកនេះ គឺមានក្រុមហ៊ុនអាកាសចរណ៍អន្តរជាតិ បានដាក់សំណើបើកជើងហោះហើរបន្ថែមមានចំនួន៧១. ២៣០ជើង ហើយចំនួននេះរំពឹងថា កើនឡើង៦៨% បើប្រៀបធៀបជើងហោះហើរឆ្នាំ២០១៩ ដែលមានប្រមាណ១០ម៉ឺន៤ ៧៧០ជើង៕
ដោយ សហការី
