ខេត្តក្រចេះ៖  កូនសត្វផ្សោតឈ្មោលមួយក្បាល មានទម្ងន់ជាង១០ គីឡូក្រាមត្រូវបានប្រជាពលរមកដ្ឋប្រទះឃើញងាប់នៅតាមដងទន្លេមេគង្គ។

ការប្រទះឃើញនោះនាថ្ងៃ៧ ខែសីហាឆ្នាំ២០២២ក្នុងភូមិកាំពី ឃុំសំបុក ស្រុកចិត្របុរី ខេត្ត ក្រចេះក្នុងតំបន់អភិរក្សតំបន់ រមណីយដ្ឋានអន្លង់ផ្សោតកាំពី ។

ប្រភពព័ត៌មានពីប្រជាពលរដ្ឋ ភូមិកំពី ឃុំសំបុក ស្រុកចិត្របុរី បានឱ្យដឹងថាមកដល់ពេលនេះ គេនៅមិនទាន់ដឹងមូលហេតុថា កូនសត្វផ្សោតខាងលើងាប់ដោយសារអ្វីនៅឡើយទេ ។

ការស្លាប់របស់កូនផ្សោតនេះ ហាក់មានភាពស្រពិចស្រពិល ប៉ុន្តែ ប្រជាពលរដ្ឋ ភូមិឃុំខាងលើបានដាក់ការសង្ស័យទៅលើការប្រើឧបករណ៍នេសាទខុសច្បាប់ ដែលនាំឱ្យមានការគំរាមកំហែង ដល់ការរស់រានរបស់ សត្វផ្សោតនៅ រមណីយដ្ឋានអន្លង់ផ្សោត កាំពីនោះ។

ក្នុងនោះរួមមាន៖ការដាក់មងខុសច្បាប់ការប្រើប្រាស់ឧបករណ៍ឆកជាដើម។

សត្វផ្សោតគឺជាប្រភេទសត្វកំម្រមួយនៅលើពិភពលោកដែលមានអង្គការជាច្រើនបាននិងកំពុងចូលរួមអភិរក្ស ក្នុងនោះអង្គការ WWF បានសហការជាមួយរាជរដ្ឋាភិបាលកម្ពុជាយ៉ាងជិតស្និទ្ធក្នុងការចូលរួមអភិរក្សសត្វផ្សោតនេះ ប៉ុន្តែដោយសារ តែការនេសាទមួយចំនួនបានប៉ះពាល់ដល់ការរស់នៅរបស់ សត្វផ្សោត ទើបធ្វើឱ្យពួកវាងាប់ជាបន្តបន្ទាប់ែបនេះ៕

ដោយ៖ ជីវ័ន្ត