ខេត្តកំពង់ស្ពឺ៖ បុរសម្នាក់បានស្លាប់ក្រោយពីជិះម៉ូតូបុកគោយន្តកន្ត្រៃពីក្រោយយ៉ាងពេញទំហឹងមក។
គ្រោះថ្នាក់ចរាចរណ៍នេះបានកើតឡើង កាលពីយប់ថ្ងៃទី០៧ ខែសីហា​ ឆ្នាំ២០២២ នៅលើផ្លូវជាតិលេខ៤៤ ត្រង់ចន្លោះគីឡូម៉ែត្រលេខ៣៣-៣៤ ស្ថិតក្នុងភូមិមនោរម្យ ឃុំឃ្លោងសំណ ស្រុកឱរ៉ាល់ ខេត្តកំពង់ស្ពឺ។
សមត្ថកិច្ចបានឱ្យដឹងថា នៅមុនពេលកើតហេតុគេឃើញម៉ូតូមួយគ្រឿង​ម៉ាកHONDA DREAM C125 សេ៊រីឆ្នាំ២០២០ ពណ៌ខ្មៅ ពាក់ស្លាកលេខ​ភ្នំពេញ​ 1ID-9761 បើកបរដោយឈ្មោះឆន សុខ ភេទប្រុស​ អាយុ៦៧ឆ្នាំ រស់នៅភូមិដីឆ្នាំង ឃុំហោងសំណំ​ ស្រុកឱរ៉ាល់ ខេត្តកំពង់ស្ពឺ បើកបរពីលិចទៅកើត ពេលមកដល់ចំណុចខាងលើ បានជ្រុលទៅបុកជាមួយគោយន្តសណ្តោងរុឺម៉ក(ដឹកអុសគ្រាក់) ដែលម្ចាស់ឈប់លើចំណែកផ្លូវ ពេញទំហឹង បណ្ដាលឱ្យអ្នកបើកម៉ូតូឈ្មោះឆន សុខ ស្លាប់ពេលបញ្ជូនទៅដល់មន្ទីរពេទ្យ។
ប្រភពដដែលបានបន្តថា ក្រោយពីកើតហេតុកម្លាំងសមត្ថកិច្ចបានចុះវាស់វែង រីឯវត្ថុតាងទាំងពីរគ្រឿងបានយកមករក្សាទុកនៅអធិការរដ្ឋាននគរបាលស្រុកឱរ៉ាល់រង់ចាំដោះស្រាយពេលក្រោយ៕

ដោយ៖ចន្ទ លីហ្សា