ភ្នំពេញ៖ ដេីម្បីទប់ស្កាត់បទល្មើសផ្សេងៗដែលអាចកើតមានឡើងជាយថាហេតុដល់បងប្អូនប្រជាពលរដ្ឋ កម្លាំងសមត្ថកិច្ចនគរបាលរាជធានីភ្នំពេញ បានបេីកកិច្ចប្រជុំបូកសរុបសភាពការណ៍សន្តិសុខ សណ្តាប់ធ្នាប់ និងពង្រឹងលើការងារបង្ការទប់ស្កាត់ បង្ក្រាបបទល្មើសព្រហ្មទណ្ឌ គ្រឿងញៀន និងក្មេងទំនើង។
ជាក់ស្ដែងដោយទទួលបានការអនុញ្ញាតពីលោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ នៅព្រឹកថ្ងៃទី១៥ ខែសីហានេះ លោកឧត្តមសេនីយ៍ទោ លី ពុធដារ៉ា ស្នងការរង ទទួលផែនការងារសេនាធិការ បានដឹកនាំកិច្ចប្រជុំបូកសរុបសភាពការណ៍ សន្តិសុខ សណ្តាប់ធ្នាប់ និងពង្រឹងលើការងារបង្ការទប់ស្កាត់ បង្ក្រាបបទល្មើសព្រហ្មទណ្ឌ គ្រឿងញៀន និងក្មេងទំនើង ដោយមានការចូលរួមពីលោកនាយរងការិយាល័យនគរបាលព្រហ្មទណ្ឌកម្រិតធ្ងន់-ស្រាល, គ្រឿងញៀន និងអធិការរងនគរបាលខណ្ឌទាំង១៤ ទទួលការងារសេនាធិការ, កិច្ចការប៉ុស្តិ៍, ព្រហ្មទណ្ឌ និងគ្រឿងញៀន។
សូមជម្រាបដែរថា ជារៀងរាល់ថ្ងៃយប់ បន្ទាប់ពីទទួលបានការរាយការណ៍ពីប្រជាពលរដ្ឋសកម្មភាពជួបជុំផឹកសុី ចាក់ធុងបាស់ បង្ករសម្លេងរំខានដល់អ្នកជិតខាង ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ ភ្លាមៗ ក្រុមការងារបានផ្តល់ព័ត៌មាន ដល់អធិការដ្ឋាននគរបាលទាំង១៤ខណ្ឌ បញ្ជាឱ្យប៉ុស្ដិ៍រដ្ឋបាលនៅក្នុងមូលដ្ឋាន ចុះអន្តរាគមន៍ដល់គោលដៅភ្លាមៗ ដោយបានបញ្ឈប់សកម្មភាពជួបជុំផឹកសុី ចាក់ធុងបាស់ បង្ករសម្លេងរំខានទាំងនោះ ព្រមទាំងបានធ្វេីការណែនាំអប់រំ និងធ្វេីកិច្ចសន្យាទៀតផង៕
ដោយ៖សហការី
