ខេត្តព្រះសីហនុ៖ លោក គួច ចំរើន អភិបាល នៃគណៈអភិបាលខេត្តព្រះសីហនុ នៅព្រឹកថ្ងៃសុក្រ ៧រោច ខែស្រាពណ៍ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១៩ ខែសីហា ឆ្នាំ២០២២ បានអញ្ជើញផ្សព្វផ្សាយរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយណាដែលស្ថិតនៅក្រោមបញ្ញតនៃច្បាប់ ស្តីពីការងារជូនកម្មករ កម្មការិនីរោងចក្រ Hing Lee (Cambodia) Co,Ltd ប្រមាណ ៣០០នាក់ នៅតំបន់សេដ្ឋកិច្ចពិសេសបិតត្រាំង ស្ថិតនៅឃុំបិតត្រាំង ស្រុកព្រៃនប់ ខេត្តព្រះសីហនុ។
លោក យ៉ូវ ខេមរ៉ា ប្រធានមន្ទីរការងារបណ្តុះបណ្តាលវិជា្ជជីវ:ខេត្តព្រះសីហនុ បានរាយការណ៍ពីសកម្មភាពការងារនៅក្នុងតំបន់សេដ្ឋកិច្ចពិសេសបិតត្រាំង ស្រុកព្រៃនប់ ដែលមានរោងចក្រ សហគ្រាសបានចុះបញ្ជីចំនួន២១២ ដែលមានកម្មករសរុបចំនួន ២៥.០៤៦នាក់ ស្រី ១៣.៤៤៨នាក់។
លោក គួច ចំរើន អភិបាលខេត្តព្រះសីហនុ បានធ្វើការសំណេះសំណាលជាមួយកម្មករ កម្មការិនីដែលបានចូលរួម និងពាំនាំការសាកសួរសុខទុក្ខ និងសេចក្តីនឹករលឹកពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសផ្សព្វផ្សាយរបបសន្តិសុខសង្គមផ្នែកសោធនសម្រាប់បុគ្គលទាំងឡាយដែលស្ថិតនៅក្រោមបញ្ញតនៃច្បាប់ ស្តីពីការងារដែលក្រសួងការងារបណ្តុះបណ្តាលបានដាក់ចេញនូវយុទ្ធនាការផ្សព្វផ្សាយរបបសន្តិសុខសង្គមផ្នែកសោធនជូនកម្មករ កម្មការិនីនៅតាមរោងចក្រ សហគ្រាសក្នុងទូទាំងប្រទេស ស្តីអំពីអត្ថប្រយោជន៍ដែលទទួលបានពីរបបសន្តិសុខសង្គម។ មានចំនួន៣ ទី១.របបសន្តិសុខសង្គម ផ្នែកគ្រោះថ្នាក់ការងារដាក់ឱ្យដំណើការនៅឆ្នាំ២០០៨ ទី២.របបសន្តិសុខសង្គម ផ្នែកថែទាំសុខភាព ដាក់ឱ្យដំណើរការនៅឆ្នាំ២០១៦ និងទី៣.របបសន្តិសុខសង្គមផ្នែកសោធន ដាក់ឱ្យអនុវត្តចាប់ពីថ្ងៃទី១ ខែកក្កដា ឆ្នាំ២០២២ថ្មីៗនេះ។
លោកអភិបាលខេត្ត បានបន្តថា ការទទួលបានអត្ថប្រយោជន៍ពីរាជរដ្ឋាភិបាល បាននឹងកំពុងតែគិតគូរជូនដល់កម្មករ កម្មការិនីនៅតាមបណ្តារោងចក្រ សហគ្រាសនៅទូទាំងប្រទេស ហើយកន្លងមកក៏មានកម្មករ កម្មការនីរបស់យើងបានទទួលនូវអត្ថប្រយោជន៍ពីរបបសន្តិសុខសង្គមផ្នែកគ្រោះថ្នាក់ការងារ និងថែទាំងសុខភាពផងដែរ។ ការផ្សព្វផ្សាយនាពេលនេះ ក្នុងគោលបំណងឱ្យបងប្អូនកម្មករ កម្មការិនីរបស់យើងមានការយល់ដឹងកាន់តែច្បាស់អំពីអត្ថប្រយោជន៍ និងការទាមទារអត្ថប្រយោជន៍ពីរបបសន្តិសុខសង្គម ស្របពេលដែលកម្ពុជាទទួលបានសុខសន្តិភាព និងការអភិវឌ្ឍរីកចម្រើនលើគ្រប់វិស័យ ដែលជាសកម្មភាពរបស់បងប្អូនដែលបានចូលរួមចំណែកយ៉ាងផុលផុស។ សូមឱ្យបងប្អូនត្រូវសិក្សាឈ្វេងយល់ពីរបបសន្តិសុខសង្គម ដើម្បីទាញយកអត្ថប្រយោជន៍នាពេលបច្ចុប្បន្ន និងទៅអនាគត។
ក្នុងឱកាសនោះ លោកអភិបាលខេត្ត ក៏បានធ្វើការអំពាវនាវក្រើនរម្លឹកដល់បងប្អូនកម្មករ កម្មការិនីទាំងអស់ត្រូវចូលរួមគោរពច្បាប់ចរាណ៍ផ្លូវគោកទាំងអស់គ្នា ដើម្បីធានាដល់សុវត្ថិភាព និងអាយុជីវិតរបស់យើង និងជីវិតអ្នកដទៃ ដោយត្រូវធ្វើការប្រុងប្រយ័តជាប់ជាប្រចាំ ព្រោះគ្រោះថ្នាក់ចរាចរណ៍កំពុងតែក្លាយជាបញ្ហាប្រឈមបង្កឱ្យបាត់បង់អាយុជីវិត និងខូចខាតទ្រព្យសម្បត្តិឯកជន និងទ្រព្យសម្បត្តិសាធារណៈជាបន្តបន្ទាប់ជារៀងរាល់ថ្ងៃផងដែរ៕
ដោយ៖សហការី
